Helgarferðir

Helgarferðir eru eins og nafnið gefur til kynna ferðir sem taka heila helgi. Göngur yfir Fimmvörðuháls eru klassískar helgarferðir en einnig hafa margar aðrar ferðir hjá Útivist fest sig svo rækilega í sessi að þær eru fastur liður á ferðaáætluninni. 

Lengri ferðir

Lengri ferðir eru göngur þar sem gengið er í þrjá daga eða meira. Í þessari dagskrá má finna bæði þekktar gönguleiðir eins og Strútsstíg og Sveinstind-Skælinga, en einnig eru þarna nokkrar spennandi nýjungar. 

Myndakvöld

Kaffi- og myndanefnd voru settar á stofn fljótlega eftir stofnun Útivistar. Markmið þeirra er að halda myndakvöld þar sem félagsmenn koma saman til að skoða myndir og hlýða á ferðasögur frá ferðum sem Útivist hefur staðið fyrir. Auk þess eru kynntar ferðir á nýjum slóðum. Oft eru fengnir utanaðkomandi aðilar til að kynna áhugaverð svæði.

Glæsilegar kaffiveitingar eru eitt aðalsmerki myndakvöldanna. Félagslegi þátturinn er stór. Útivistarfélagar hittast, rifja upp góðar stundir og gæða sér á kræsingum af kökuhlaðborðinu.

Myndakvöld eru haldin fimm sinnum yfir vetrarmánuðina og njóta mikilla vinsælda. Allur ágóði af myndakvöldunum er nýttur til að efla félagið. Lengst af var hann settur í uppbyggingu aðstöðu félagsins í Básum á Goðalandi. Nú síðustu ár hefur ágóðanum verið varið í kaup og uppsetningu útsýnisskífu á Réttarfelli og glæsileg fræðsluskilti í Básum.

Öll herlegheitin kosta aðeins 1.500 kr. Gestir eru vinsamlegast beðnir að hafa handbært reiðufé því ekki er hægt að taka við greiðslukortum.

Everesthópur

Everest hópur Útivistar hefur göngu sína á ný!

Everest hópur Útivistar fer hærra og lengra með það að markmiði að njóta en ekki að þjóta.

Everest hópurinn er hópur fyrir göngufólk sem vill fara hærra, lengra og takast á við krefjandi aðstæður. Gert er ráð fyrir að þátttakendur hafi reynslu af göngum á „hærri“ fjöll þar sem flestar ferðirnar eru miðaðar við þriggja og fjögurra skóa ferðir.  

Hópurinn ætlar, á árinu 2021, að fara samanlagt jafn marga hæðarmetra og tvö af hæstu fjöllum tveggja heimsálfa, Elbrus í Evrópu og Kilimanjaro í Afríku. Samanlögð hæð þeirra fjalla er um 11.600 metrar.

Farið verður í dagsferðir síðasta laugardag flesta mánuði ársins og einnig verða farnar helgarferðir í sumar og haust. Einhverjar ferðir eru farnar með öðrum hópum innan félagsins.

Þátttökugjald fyrir síðari hluta 2021 er 24.500 kr. Reynt verður eftir fremsta megni að sameinast í bíla en þegar það er ekki hægt er farið saman í rútu og er greitt sérstaklega fyrir þær ferðir. Í helgarferðum bætist einnig  gistikostnaður við.

Ávallt eru minnst tveir reyndir fararstjórar í hverri ferð.

Fjöldi þátttakenda eru 30.

Fjallfarar

Fjallfarar Útivistar er samhentur hópur sem gengur saman 20 skipulagðar göngur frá ágúst fram í júní ár hvert.  Að jafnaði er ein kvöldganga í mánuði og ein dagsferð með undantekningum þó en dagskránni lýkur með helgarferð . Í kvöldgöngum og einstaka dagsferðum sameinast hópurinn í bíla en í öðrum ferðum verður ferðast í rútu.  Allajafna er brottför í kvöldgöngur kl. 18:00 á miðvikudegi og helgarferð kl. 8:00 á laugardegi.

Fjallfarar henta þeim sem þegar hafa tekið sín fyrstu skref í fjallgöngum og útivist og vilja ferðast drjúgar dagleiðir og krefjandi kvöldgöngur í góðra vina hópi.  Byrjendum og skemur komnum bendum við á Útivistarlífið Rík áhersla er lögð á liðsheild og félagsanda meðal Fjallfara.

Fararstjórar Fjallfara eru Björgólfur Thorsteinsson, Guðrún Svava Viðarsdóttir, Jóhanna Fríða Dalkvist og Guðmundur Örn Sverrisson.

Jeppaferðir

Í jeppaferðum koma þátttakendur á eigin jeppum. Ferðast er í hóp undir leiðsögn fararstjóra sem hefur góða reynslu af þessari tegund ferðamennsku. Bæði er um að ræða vetrarferðir þar sem gerðar eru tilteknar kröfur um búnað jeppanna, svo og sumar- og haustferðir sem henta lítið breyttum eða óbreyttum jeppum. 

Útivistarlífið

Útivistarlífið er ný, spennandi og fjölbreytt þriggja mánaða dagskrá fyrir byrjendur og lengra komna í útivist.  Þátttakendum gefst kostur á að prufa ýmsar greinar útivistar og erfiðleikastig miðast við byrjendur, 1-2 skór, léttar og miðlungs erfiðar ferðir sem flestir geta tekið þátt hafi þeir réttan útbúnað og líkamlega getu til þess.

Fjölbreytni ferða og samheldni hópsins verður í fyrirrúmi í Útivistarlífinu sem er kjörin dagskrá fyrir fólk sem vill njóta náttúrunnar í góðum hópi og prufa eitthvað nýtt í bland við klassískar Útivistarferðir.

Dagskrá Útivistarlífsins hefst í aftur í ágúst 2020.  

Fararstjórar Útivistarlífsins eru Auður Jóhannsdóttir, Hanna Guðmundsdóttir, Kristjana Kristjánsdóttir, Ragnheiður Ýr Grétarsdóttir, Snorri Guðjónsson, Steinunn S. Ólafardóttir, Þórlaug Sveinsdóttir og Guðmundur Örn Sverrisson.  

Skíðaferðir