Beint í leiðarkerfi vefsins.
Ferðafélagið Útivist stendur fyrir fjölbreyttum ferðum árið um kring. Tilgangur félagsins er að stuðla að útivist fólks í hollu og óspilltu umhverfi.
Útivist býður upp á dagsferðir, helgarferðir, sumarleyfisferðir og kvöldfgöngur með Útivistargírnum. Einnig býður jeppadeildin upp á margar mismunandi ferðir jafnt sumar sem vetur. Allir ættu að finna eitthvað við sitt hæfi allt frá léttum gönguferðum upp í erfiðar fjallaferðir að sumri og vetri fyrir vel þjálfað fólk.
Helgarferðir eru eins og nafnið gefur til kynna ferðir sem taka heila helgi. Göngur yfir Fimmvörðuháls eru klassískar helgarferðir en einnig hafa margar aðrar ferðir hjá Útivist fest sig svo rækilega í sessi að þær eru fastur liður á ferðaáætluninni.
Lengri ferðir eru göngur þar sem gengið er í þrjá daga eða meira. Í þessari dagskrá má finna bæði þekktar gönguleiðir eins og Strútsstíg og Sveinstind-Skælinga, en einnig eru þarna nokkrar spennandi nýjungar.
Kaffi- og myndanefnd voru settar á stofn fljótlega eftir stofnun Útivistar. Markmið þeirra er að halda myndakvöld þar sem félagsmenn koma saman til að skoða myndir og hlýða á ferðasögur frá ferðum sem Útivist hefur staðið fyrir. Auk þess eru kynntar ferðir á nýjum slóðum. Oft eru fengnir utanaðkomandi aðilar til að kynna áhugaverð svæði.
Glæsilegar kaffiveitingar eru eitt aðalsmerki myndakvöldanna. Félagslegi þátturinn er stór. Útivistarfélagar hittast, rifja upp góðar stundir og gæða sér á kræsingum af kökuhlaðborðinu.
Myndakvöld eru haldin fimm sinnum yfir vetrarmánuðina og njóta mikilla vinsælda. Allur ágóði af myndakvöldunum er nýttur til að efla félagið. Lengst af var hann settur í uppbyggingu aðstöðu félagsins í Básum á Goðalandi. Nú síðustu ár hefur ágóðanum verið varið í kaup og uppsetningu útsýnisskífu á Réttarfelli og glæsileg fræðsluskilti í Básum.
Öll herlegheitin kosta aðeins 1.500 kr. Gestir eru vinsamlegast beðnir að hafa handbært reiðufé því ekki er hægt að taka við greiðslukortum.
Hjólaræktin hefur starfað í allnokkur ár, en sífellt fleiri uppgötva hvað reiðhjólið er frábært til ferðalaga. Fastir liðir eru hjólatúrar á höfuðborgarsvæðinu á laugardögum yfir vetrartímann en þegar kemur fram á sumar er stefnan gjarnan tekin á lengri túra.
Fjallfarar Útivistar er samhentur hópur sem gengur saman 20 skipulagðar göngur frá ágúst 2019 fram í júní 2020. Að jafnaði er ein kvöldganga í mánuði og ein dagsferð með undantekningum þó en dagskránni lýkur með trússaðri helgarferð . Í kvöldgöngum og einstaka dagsferðum sameinast hópurinn í bíla en í öðrum ferðum verður ferðast í rútu. Allajafna er brottför í kvöldgöngur kl. 18:00 á miðvikudegi og helgarferð kl. 8:00 á laugardegi.
Fjallfarar henta þeim sem þegar hafa tekið sín fyrstu skref í fjallgöngum og útivist og vilja ferðast drjúgar dagleiðir og skemmtilegar kvöldgöngur í góðra vina hópi. Byrjendum og skemur komnum bendum við á Útivistarlífið Rík áhersla verður lögð á liðsheild og félagsanda.
Fararstjórar Fjallfara eru Björgólfur Thorsteinsson, Guðrún Svava Viðarsdóttir, Jóhanna Fríða Dalkvist og Guðmundur Örn Sverrisson.
Í jeppaferðum koma þátttakendur á eigin jeppum. Ferðast er í hóp undir leiðsögn fararstjóra sem hefur góða reynslu af þessari tegund ferðamennsku. Bæði er um að ræða vetrarferðir þar sem gerðar eru tilteknar kröfur um búnað jeppanna, svo og sumar- og haustferðir sem henta lítið breyttum eða óbreyttum jeppum.
Á námskeiðum Fjallarefa er gönguþrek markvisst byggt upp og þátttakendur kynnast fjölbreyttum gönguleiðum.
Námskeið Fjallarefa er ætlað þeim sem áður hafa tekið þátt í námskeiðum og/eða eru í ágætis gönguformi. Námskeiðið felur í sér þrekgöngutíma, dagsferðir og helgarferð. Samhliða göngunum verður fræðsla þar sem þátttakendur safna í sarpinn hagnýtum upplýsingum sem tengjast útivist, til dæmis varðandi klæðnað, næringu, útbúnað og leiðarval.
Þrekgöngutímar eru á þriðjudögum og dagsferðir á laugardögum. Þátttakendur koma á eigin bílum á upphafsstað göngu en geta sameinast í bíla eftir hentugleikum.
Útivistarlífið er ný, spennandi og fjölbreytt þriggja mánaða dagskrá fyrir byrjendur og lengra komna í útivist. Þátttakendum gefst kostur á að prufa ýmsar greinar útivistar og erfiðleikastig miðast við byrjendur, 1-2 skór, léttar og miðlungs erfiðar ferðir sem flestir geta tekið þátt hafi þeir réttan útbúnað og líkamlega getu til þess.
Fjölbreytni ferða og samheldni hópsins verður í fyrirrúmi í Útivistarlífinu sem er kjörin dagskrá fyrir fólk sem vill njóta náttúrunnar í góðum hópi og prufa eitthvað nýtt í bland við klassískar Útivistarferðir.
Dagskrá Útivistarlífsins hefst í ágúst og verður kynnt í maí.
Fararstjórar Útivistarlífsins eru Auður Jóhannsdóttir, Hrönn Baldursdóttir, Jóhanna Fríða Dalkvist, Kristjana Kristjánsdóttir, Ragnheiður Ýr Grétarsdóttir og Guðmundur Örn Sverrisson.
Ókeypis göngur í nágrenni höfuðborgarinnar
Komdu þér í Útivistargírinn fyrir sumarið með samheldnum hópi Útivistarfólks og nýrri tólf vikna dagskrá.
Útivistargírinn heldur af stað fjórða árið í röð og hefur starfið notið mikilla vinsælda frá því starfið hóf göngu sína árið 2016. Fjölmargir hafa tekið sín fyrstu skref í Útivist og fjallgöngum með Útivistargírnum jafnt þaulvönu Útivistarfólki.
Dagskráin hefst 3. apríl og stendur til 19. júní. Hópurinn hittist vikulega á miðvikudögum klukkan 18:00 og gengur spennandi gönguleiðir í nágrenni höfuðborgarsvæðisins. Göngurnar henta flestum sem geta hreyft sig með góðu móti og eru nýliðar í útivist jafnt sem vant fólk hvatt til þess að taka þátt. Í þessum kvöldgöngum er lögð áhersla á vinalegt andrúmsloft og kynningu á grunnatriðum í útivist og gönguferðum. Fjölbreytt starfsemi Útivistar, þar sem allir geta fundið eitthvað við sitt hæfi, verður einnig kynnt þátttakendum.
Flestar göngurnar taka 2 – 4 klukkustundir. Þátttakendur sameinast í bíla og deila eldsneytiskostnaði.
Kynningarfundur verður haldinn kl. 20:00 þann 20. mars.
Þátttaka í göngunum er félagsmönnum Útivistar að kostnaðarlausu en skrá þarf þátttöku. Áhugasömum er bent á upplýsingar um skráningu á heimasíðu Útivistar en skráning og upplýsingar um göngurnar fara að mestu fram á Facebook. Gönguleiðirnar eru fjölbreyttar og tekur röð þeirra mið af veðri og færð hverju sinni. Auglýst verður á vef Útivistar, á Facebook síðu félagsins og á póstlista hvert verður farið hverju sinni.
Sex fararstjórar, Auður Jóhannsdóttir, Guðrún Svava Viðarsdóttir, Jóhanna Benediktsdóttir, Jóhanna Fríða Dalkvist, Kristjana Kristjánsdóttir og Guðmundur Örn Sverrisson leiða þátttakendur Útivistargírsins. Óhætt er að segja að fararstjórahópurinn sé fjölbreyttur en samhentur og hlakkar til að taka vel á móti öllum þeim sem vilja komast í Útivistargírinn.
Fylgstu með og skráðu þig á Facebook síðu Útivistargírsins.
Í þessari ferð verður á laugardeginum gengið inn að Tungnakvíslarjökli, er fellur úr vestanverðum Mýrdalsjökli inn af Básum. Þar uppgötvaðist nýverið, við samanburð eldri og yngri loftmynda, að umfangsmikil aflögun hefur orðið á hlíðinni norðan hans á undanförnum áratugum og stendur enn. Á sama stað hafa um nokkurra ára skeið mælst djúpir jarðskjálftar, og er samhengi þessara þátta ansi forvitnilegt.
frá BSÍ kl. 8:00
Fanntófell er móbergsfell sem stendur skammt frá Oki. Gangan hefst við suðurenda Hrúðurkarla á Kaldadalsleið. Þægileg fjögurra km ganga er að fjallinu um slétta mela og verður farið upp á fjallið að suðvestanverðu. Haldið af fjallinu í norðaustur og gengið á Lyklafell (845 m). Útsýni er afar gott af Fanntófelli þegar vel viðrar, einkum til suðurs og vesturs.
kl. 9.00
Ekið austur í Þorlákshöfn en þaðan verður hjólað eftir hinum nýja Suðurstrandarvegi vestur fyrir Hlíðarvatn með viðkomu í byggðinni í Selvogi. Gamla Suðurstrandarvegi og Þorlákshafnarvegi fylgt til baka.
Hlöðufell er formfagur móbergsstapi og tignarlegt fjall. Það er hæsta fjallið á hálendinu suður af Langjökli og góð áskorun fyrir göngufólk. Gengið upp bratta hlíð upp á klettabelti ofarlega í fjallinu og inn dalverpi áður en hæsta tindinum er náð. Þetta er besta gönguleiðin á fjallið en það er hömrum girt allt um kring. Farin verður sama leið til baka að sæluhúsinu á Hlöðuvöllum.
Brúará á upptök sín á Rótarsandi og fellur niður um Brúarárskörð á milli Högnhöfða og Rauðafells. Í Brúarárskörðum streymir vatn víða út úr berginu þannig að áin verður fljótt mikið vatnsfall. Hún hefur grafið hrikalegt gljúfur og fellur í fossum niður á undirlendið. Þetta gljúfur verður skoðað og síðan haldið niður með Brúará og eftir vegslóða að Úthlíð.
frá BSÍ kl. 17:00
Í Básum eru víða góð berjalönd en þau eru stundum það vel falin að ekki er auðvelt að finna þau. Þarna eru bragðgóð krækiber, bláber, hrútaber og einiber. Farið verður í léttar gönguferðir með berjaföturnar meðferðis. Nýting á afurðum úr náttúrunni og uppskriftir skoðaðar og svo verða berin auðvitað borðuð.
frá BSÍ kl. 9:30
Fyrsti áfangi raðgöngu frá Maríuhöfn í Kjós að Skálholti. Maríuhöfn var verslunarstaður fram á 15. öld og var m.a. sótt í kaupstað þangað frá Skálholti. Frá Maríuhöfn verður gengið að Hvammsvík og komið við hjá Steðja, farið yfir gömlu brúna á Fossá og eftir gamla veginum inn í Brynjudal að Ingunnarstöðum.
frá BSÍ kl. 19:00
Hraðferð um Laugaveginn er tilvalin fyrir þá sem eru í þokkalegu gönguformi og vilja fara þessa fjölförnu leið á þeim tíma þegar fáir eru á ferli. Farið með rútu í Landmannalaugar á fimmtudagskvöldi og gist í skálanum þar. Á föstudegi verður gengið um Hrafntinnusker og niður í Hvanngil þar sem er gist. Þaðan verður gengið um Emstrur niður í Þórsmörk þar sem gist verður í skála í Básum. Þar bíður göngumanna grillveisla, varðeldur og ósvikin Básastemmning. Á sunnudegi gefst færi á göngu um Goðaland áður en lagt verður af stað heim á leið.
Að loknu góðu ferðasumri liggja allar leiðir í Bása til að taka á móti haustinu. Á þeim tíma er einstakt að heimsækja Goðaland því þá gleðja haustlitirnir augað hvert sem litið er. Gönguferðir og holl útivist er einkenni ferðarinnar og því verður farið í góða göngu um Goðaland. Gönguleið verður valin eftir veðri og aðstæðum. Á laugardagskvöldi verður grillveisla og varðeldur að hætti Útivistar.
kl. 9.00 frá Olís Norðlingaholti.
Ekið að skemmunni við gömlu Markarfljótsbrúna og hjólað sem leið liggur inn í Bása þar sem hópurinn sameinast öðrum Útivistarfélögum í ,,grill og gaman“ ferðinni. V
Hvar er betra að sitja og prjóna á notalegu haustkvöldi en í upplýstum skála? Kannski úti undir berum himni? Útivist og Handóðir prjónarar slá upp prjóna- og gönguveislu í Básum. Áhugaverðir fyrirlestrar af ýmsum toga, örnámskeið, prjónahópar og gönguferðir en síðast en ekki síst grillveisla og kvöldvaka með söng og gleði að hætti Útivistar.
Gengið inn hinn skógi vaxna og giljum prýdda Brynjudal upp á Hrísháls og að Djúpadalsborgum. Þaðan verður gengið inn á hina hefðbundnu leið yfir Leggjabrjót og síðan að Skógarhólum.
Í Þjórsárdal er búið að grafa upp mörg gömul bæjarhús en gangan hefst hjá því frægasta, Stöng. Gengið upp með Rauðá upp að Gjánni og hún skoðuð. Síðan verður haldið upp á Stangarfjall og yfir fjallið allt að árgilinu og ef aðstæður leyfa farið niður í gilið og fossarnir skoðaðir neðan frá áður en gengið er upp að bílastæði við fossana.
Ekið að Þjónustumiðstöðinni á Þingvöllum. Hjólað réttsælis meðfram Þingvallavatni og niður með Úlfljótsvatni.
Gengið með rótum Ármannsfells um Bolabás og austur fyrir fjallið. Þar er komið inn á Prestastíg og honum fylgt austur fyrir Hrafnabjörg en þar verður sveigt af leið upp að Stóru-Eldborg. Farið á milli Dímona, að Barmaskarði og að Laugarvatnshellum.
frá BSÍ kl. 9:30.
Hrafnabjörg við austanvert Þingvallavatn er fjall sem margir horfa til og langar að sigra. Frá Barmaskarði verður gengið vestanvert við Reyðarbarm og síðan yfir hraunið að Hrafnabjörgum. Af fjallinu er ægifagurt útsýni yfir Þingvelli.
kl. 09:00 frá Hrauneyjum.
Hin forna leið frá Svarthöfða í suðurenda Vonarskarðs að Jökulheimum er ein skemmtilegasta jeppaleið sem til er. Glíman við brattar brekkur og straumharðar ár gleymist fljótt þegar hið stórkostlega útsýni af hæstu hæðum leiðarinnar blasir við. Hist í Hrauneyjum að morgni dags. Þaðan verður haldið norður Sprengisandsleið og að Svarthöfða við norðurenda Hágöngulóns. Gist verður í skála Jöklarannsóknafélagsins í Jökulheimum. Möguleiki á að aka um Breiðbak á heimleið.
Ekið að afleggjaranum inn á Vigdísarvelli, frá Hafnarfirði. Hjólað inn Móhálsadal að Djúpavatni meðfram Núpshlíðarhálsi. Við Hamradal er stefnt á Borgarhóla og að Krýsuvík. Farið meðfram Kleifarvatni til baka.
Gengið að Vallaréttum og með Litla-Reyðarbarmi niður í Kringlumýri. Þaðan um Biskupsbrekkur, utan í hlíðum Lyngdalsheiðar og komið á veg á milli Þóroddsstaða og Neðra-Apavatns.
frá BSÍ kl. 10:00
Ferðin verður skipulögð þannig að börnin skemmti sér vel og hafi nóg fyrir stafni. Tímanum varið í könnunarferðir um svæðið, þrautir og leiki. Á kvöldin verður spilað, leikið, efnt til sögustunda og himininn kannaður allt eftir því hvernig veðrið verður. Farið verður í ratleik á heimleiðinni.
Gengið eftir Sveifluhálsi á Miðdegishnúk. Þaðan liggur leiðin að Arnarvatni og um Baðstofu niður í Seltún. Vegalengd 16 km. Hækkun 300 m. Göngutími 6-7 klst.
kl. 10:00. frá Hrauneyjum.
Hin fornu vöð frumkvöðlanna könnuð svo sem Bjallavað og Hófsvað í Tungnaá. Hlynur Snæland er þaulvanur björgunarsveitarmaður og hann fer yfir öryggisatriði og annað sem hafa þarf í huga þegar glímt er við hin stóru fljót.
kl. 10.00.
Í þessari lokagöngu raðgöngunnar „heim úr kaupstað“ verður gengið sunnan Apavatns, yfir Mosfell og þaðan yfir Brúará. Áfram liggur leiðin yfir Skálholtsása að Skálholti.
Örnefnin Smáþúfur á Lág-Esju eru frekar hógvær en það sama verður ekki sagt um göngu á þær. Gengið með brúnum Lág-Esju að Arnarhamri og þaðan upp á Þúfurnar. Gott útsýni er yfir Faxaflóa á þessari gönguleið.
Hjólað um stíga og skuggasund vesturbæjar. Vegalengd um 20 km og áætlaður hjólatími 2 klst. Allir velkomnir. Ekkert þátttökugjald fyrir félagsmenn í Útivist. Aldurstakmark 16 ár.
Skálafell er mjög áberandi fjall þegar ekið er austur fyrir fjall. Þaðan er víðsýnt og sést jafnt út í Eyjar sem til jökla ef það birtan er næg. Gangan hefst við Hellisheiðarveg en þaðan er farið á Hverahlíð og upp á Skálafell vestan til. Síðan haldið á Stóra-Sandfell og um Lakastíg að Hveradölum.
Gengið norðan Helguvíkur að Hólmsbergsvita en síðan með ströndinni um Leiru og út að Garðsskagavita. Vegalengd 12 km. Hækkun engin. Göngutími 4 klst.
kl. 10.00
Hjólað meðfram Vesturlandsvegi upp í Mosfellsdal og beygt út af veginum í átt að Skammadal. Þegar komið er aftur niður í Mosfellsbæ er stefnan tekin upp með Úlfarsfelli og inn á Hafravatnsveg. Hjólað upp á Hólmsheiðarveg og þaðan aftur til baka.
Aðventuferðirnar í Bása eru alltaf frábær skemmtun bæði fyrir börn og fullorðna. Vetrarríkið skartar sínu fegursta og einhverjum sögum fer af því að jólasveinum bregði fyrir í fjöllunum og jafnvel fleiri meðlimum þeirrar fjölskyldu. Þegar skyggja tekur verður sest að jólahlaðborði og blásið til kvöldvöku. 50% afsláttur fyrir börn 7-16 ára og frítt fyrir yngri en 7 ára.
Gengið verður frá Ósabotnum og með ströndinni að Stafnesi. Á leiðinni eru staðir eins og Þórshöfn en þar var eitt sinn höfn og Básendar sem var einn af stærri verslunarstöðum landsins fram til 1799. Staðurinn fór í eyði í Básendaflóðinu sem er eitt mesta sjávarflóð sem gengið hefur yfir landið. Margir staðfuglar hafa vetursetu við Ósa.
frá BSÍ kl. 11:00
Fjölskylduganga í Heiðmörk. Leiðaval miðast við viðburði. Þátttakendur koma á eigin farartækjum á Borgarstjóraplan.
Hjólað um miðbæinn og kíkt á jólamarkað á Ingólfstorgi og fleira. Vegalengd 20 km og áætlaður hjólatími 2 klst. Allir velkomnir. Ekkert þátttökugjald fyrir félagsmenn í Útivist. Aldurstakmark 16 ár.
Fjölskylduganga í Heiðmörk. Þátttakendur koma á eigin farartækjum að bílaplani milli Elliðavatns og Helluvatns. Gangan endar á jólamarkaði á Elliðavatni.
frá BSÍ kl. 8:30
Það er fátt sérstakara en að kveðja gamla árið og fagna nýju í fögrum fjallasal umkringdum stórbrotinni náttúru, jöklum og eldfjöllum. Áramót í Básum eru ógleymanleg upplifun með gönguferðum, góðum mat, blysför, áramótabrennu, flugeldum og fleiru skemmtilegu. Allt góðum félagsskap manna, álfa og trölla eins og vera ber um áramót.
Ferðaáætlun Útivistar 2019 er komin á vefinn. Kynningarblað liggur frammi á skrifstofu Útivistar en jafnframt er hægt að feltta því í vefútgáfu.