Beint í leiðarkerfi vefsins.
Ferðafélagið Útivist stendur fyrir fjölbreyttum ferðum árið um kring. Tilgangur félagsins er að stuðla að útivist fólks í hollu og óspilltu umhverfi.
Útivist býður upp á dagsferðir, helgarferðir, sumarleyfisferðir og kvöldfgöngur með Útivistargírnum. Einnig býður jeppadeildin upp á margar mismunandi ferðir jafnt sumar sem vetur. Allir ættu að finna eitthvað við sitt hæfi allt frá léttum gönguferðum upp í erfiðar fjallaferðir að sumri og vetri fyrir vel þjálfað fólk.
Helgarferðir eru eins og nafnið gefur til kynna ferðir sem taka heila helgi. Göngur yfir Fimmvörðuháls eru klassískar helgarferðir en einnig hafa margar aðrar ferðir hjá Útivist fest sig svo rækilega í sessi að þær eru fastur liður á ferðaáætluninni.
Lengri ferðir eru göngur þar sem gengið er í þrjá daga eða meira. Í þessari dagskrá má finna bæði þekktar gönguleiðir eins og Strútsstíg og Sveinstind-Skælinga, en einnig eru þarna nokkrar spennandi nýjungar.
Kaffi- og myndanefnd voru settar á stofn fljótlega eftir stofnun Útivistar. Markmið þeirra er að halda myndakvöld þar sem félagsmenn koma saman til að skoða myndir og hlýða á ferðasögur frá ferðum sem Útivist hefur staðið fyrir. Auk þess eru kynntar ferðir á nýjum slóðum. Oft eru fengnir utanaðkomandi aðilar til að kynna áhugaverð svæði.
Glæsilegar kaffiveitingar eru eitt aðalsmerki myndakvöldanna. Félagslegi þátturinn er stór. Útivistarfélagar hittast, rifja upp góðar stundir og gæða sér á kræsingum af kökuhlaðborðinu.
Myndakvöld eru haldin fimm sinnum yfir vetrarmánuðina og njóta mikilla vinsælda. Allur ágóði af myndakvöldunum er nýttur til að efla félagið. Lengst af var hann settur í uppbyggingu aðstöðu félagsins í Básum á Goðalandi. Nú síðustu ár hefur ágóðanum verið varið í kaup og uppsetningu útsýnisskífu á Réttarfelli og glæsileg fræðsluskilti í Básum.
Öll herlegheitin kosta aðeins 1.500 kr. Gestir eru vinsamlegast beðnir að hafa handbært reiðufé því ekki er hægt að taka við greiðslukortum.
Hjólaræktin hefur starfað í allnokkur ár, en sífellt fleiri uppgötva hvað reiðhjólið er frábært til ferðalaga. Fastir liðir eru hjólatúrar á höfuðborgarsvæðinu á laugardögum yfir vetrartímann en þegar kemur fram á sumar er stefnan gjarnan tekin á lengri túra.
Fjallfarar Útivistar er samhentur hópur sem gengur saman 20 skipulagðar göngur frá ágúst 2019 fram í júní 2020. Að jafnaði er ein kvöldganga í mánuði og ein dagsferð með undantekningum þó en dagskránni lýkur með trússaðri helgarferð . Í kvöldgöngum og einstaka dagsferðum sameinast hópurinn í bíla en í öðrum ferðum verður ferðast í rútu. Allajafna er brottför í kvöldgöngur kl. 18:00 á miðvikudegi og helgarferð kl. 8:00 á laugardegi.
Fjallfarar henta þeim sem þegar hafa tekið sín fyrstu skref í fjallgöngum og útivist og vilja ferðast drjúgar dagleiðir og skemmtilegar kvöldgöngur í góðra vina hópi. Byrjendum og skemur komnum bendum við á Útivistarlífið Rík áhersla verður lögð á liðsheild og félagsanda.
Fararstjórar Fjallfara eru Björgólfur Thorsteinsson, Guðrún Svava Viðarsdóttir, Jóhanna Fríða Dalkvist og Guðmundur Örn Sverrisson.
Í jeppaferðum koma þátttakendur á eigin jeppum. Ferðast er í hóp undir leiðsögn fararstjóra sem hefur góða reynslu af þessari tegund ferðamennsku. Bæði er um að ræða vetrarferðir þar sem gerðar eru tilteknar kröfur um búnað jeppanna, svo og sumar- og haustferðir sem henta lítið breyttum eða óbreyttum jeppum.
Útivistarlífið er ný, spennandi og fjölbreytt þriggja mánaða dagskrá fyrir byrjendur og lengra komna í útivist. Þátttakendum gefst kostur á að prufa ýmsar greinar útivistar og erfiðleikastig miðast við byrjendur, 1-2 skór, léttar og miðlungs erfiðar ferðir sem flestir geta tekið þátt hafi þeir réttan útbúnað og líkamlega getu til þess.
Fjölbreytni ferða og samheldni hópsins verður í fyrirrúmi í Útivistarlífinu sem er kjörin dagskrá fyrir fólk sem vill njóta náttúrunnar í góðum hópi og prufa eitthvað nýtt í bland við klassískar Útivistarferðir.
Dagskrá Útivistarlífsins hefst í aftur í febrúar en við bendum áhugasömum á að taka þátt í Nýársþreki Útivistar í janúar og halda svo áfram í Útivistarlífinu. Opnað verður fyrir skráningu þann 17. október klukkan 9:00.
Fullbókað er í Útivistarlífið - vor 2020. Ef þú vilt fá tölvupóst þegar opnað verður fyrir skráningu í Útivistarlífið - haust 2020, sendu þá línu á utivist@utivist.is og skráðu þig á biðlistann.
Fararstjórar Útivistarlífsins eru Auður Jóhannsdóttir, Hanna Guðmundsdóttir, Hrönn Baldursdóttir, Kristjana Kristjánsdóttir, Ragnheiður Ýr Grétarsdóttir, Ragnheiður Valgarðsdóttir, Snorri Guðjónsson, Sverrir Árnason og Guðmundur Örn Sverrisson.
Komdu þér í Útivistargírinn fyrir sumarið með samheldnum hópi og tólf vikna kvöldferðadagskrá.Fyrsta gangan er 1. apríl og stendur dagskrá fram til 18. júní. Hópurinn hittist vikulega á miðvikudögumklukkan 18:00 og gengur saman spennandi gönguleiðir í nágrenni höfuðborgarsvæðisins. Göngurnar henta flestum sem geta hreyft sig með góðu móti og eru nýliðar í útivist sem og vant fólk hvatt til þess að taka þátt.
Samhliða kvöldgöngunum verður lögð áhersla á að kynna grunnatriði í útivist og gönguferðum. Fjölbreytt starfsemi Útivistar, þar sem allir geta fundið eitthvað við sitt hæfi, verður einnig kynnt þátttakendum. Í þessum göngum er lögð áhersla á vinalegt andrúmsloft svo allir eigi góða stund saman.
Göngurnar taka flestar 2,5-3,5 klukkustundir. Þátttakendur sameinast í bíla og deila eldsneytiskostnaði.Kynningarfundur verður haldinn þann 25. mars kl. 20:00 í sal Garðyrkjufélags Íslands, Síðumúla 1.
Þátttaka í göngunum er innifalin í félagsgjaldi Útivistar. Gönguleiðirnar eru fjölbreyttar og tekur röð þeirra mið af veðri og færð hverju sinni.
Fararstjórar Útivistargírsins eru Auður Jóhannsdóttir, Kristjana Kristjánsdóttir, Jóhanna Benediktsdóttir og Guðmundur Örn Sverrisson. Óhætt er að segja að fararstjórahópurinn sé fjölbreyttur en samhentur og hlakkar til að taka vel á móti öllum þeim sem vilja komast í Útivistargírinn.
Athugið að í ljósi sóttvarna er dagskrá Útivistargírsins er frestað um óákveðinn tíma.
Þrekhópur Útivistar er nýr dagskrárliður Ferðafélagsins Útivistar sem hentar þeim sem vilja koma sér í eða vilja halda sér í fjallgönguformi. Með þátttöku í Þrekhópi Útivistar geta þátttakendur tekið þátt í þrekæfingum á þriðjudögum og styttri ferðum af fjölbreyttum toga á fimmtudögum fyrir fast, lágt mánaðargjald.
Fararstjórateymi Þrekhóps Útivistar samanstendur af sjúkraþjálfurum, yogakennurum og reyndum fararstjórum sem stýra ferðum með markvissum en ekki síst líflegum hætti. Eins og í öðru hópastarfi Útivistar er rík áhersla lögð á samheldni, öryggi og gleði.
Almenn skráning hefst í byrjun febrúar en forskráning stendur yfir - hægt er að skrá sig með tölvupósti á netfangið utivist@utivist.is.
Smelltu hér fyrir nánari upplýsingar og dagskrá.
Fararstjórar Þrekhóps Útivistar eru: Auður Jóhannsdóttir, Guðrún Svava Viðarsdóttir, Hanna Guðmundsdóttir, Kristjana Kristjánsdóttir, Steinunn S. Ólafardóttir, Ragnheiður Ýr Grétarsdóttir og Guðmundur Örn Sverrisson.
Ferðaáætlun Útivistar 2020 er komin út. Kynningarblað liggur frammi á skrifstofu Útivistar en jafnframt er hægt að feltta því í vefútgáfu. Einnig er hægt að sækja pdf útgáfu.