Langleiðin: Langanes – Grímsstaðir á Fjöllum

Dags:

lau. 18. júl. 2020 - fös. 24. júl. 2020

Brottför:

auglýst síðar.

  • Tjald

Á þessu ári hefst Langleiðin aftur hjá Útivist en þessi raðganga mun taka fjögur ár. Langleiðin hefur tvisvar sinnum áður verið farin á vegum Útivistar, árin 2008 – 2010 og 2013 – 2015. Þá var gengið frá Reykjanestá að Langanesi um 730 km á 34 og 33 göngudögum. Árin 2016 – 2019 tók svo raðgangan „Horn í Horn“ við og var þá gengið frá Hvalnesvita við Eystra-Horn í Lóni um Lónsöræfi, yfir hálendið, um Strandir og inn á Hornstrandir að Horni í Hornvík. „Horn í Horn“ leiðin var um 780 km löng og var gengin á 33 göngudögum.

Á síðasta ári luku sjö Útivistarfélagar við að krossa landið á vegum Útivistar með því að ljúka báðum þessum raðgöngum. Búast má búast við að raðgangan „Horn í Horn“ verði endurtekin að þessari Langleið lokinni og fleiri bætist í hóp þeirra sem hafa krossað landið.

Að þessu sinni verður Langleiðin gengin í gagnstæða átt frá því sem áður var, þ.e. frá Fonti á Langanesi að Reykjanestá á Reykjanesskaga. Fyrri Langleiðir tóku þrjú ár en það var mögulegt því fyrsti fjórðungur leiðarinnar, Reykjanestá að Hagavatni við Langjökul var farinn í dagsgöngum frá mars og fram eftir sumri. Núna mun Langleiðin standa í fjögur ár þar sem engar dagsgöngur verða á lokakaflanum heldur verður öll raðgangan gengin í 4. – 8. daga leggjum. Gist verður í skálum ef þeir eru á heppilegum stöðum á leiðinni en annars í tjöldum. Farangurinn verður trússaður á milli svefnstaða nema um Þjórsárver þar sem bera þarf allan farangur.

Áætlaðir leggir Langleiðarinnar:

2020              Fontur – Heljardalsfjöll – Grímsstaðir Fjöllum

2021              Jökulsá á Fjöllum – Nýidalur

2022              Nýidalur – Þjórsárver – Kerlingarfjöll

2023              Hagavatn – Reykjanestá

Gangan í ár hefst við Font á Langanesi og endar við Grímsstaði á Fjöllum. Þátttakendur koma sér á eigin vegum að Grímsstöðum og geta skilið þar eftir bíla, en rúta tekur hópinn og ekur honum á Font. Áfangar göngunnar eru áætlaðir sem hér segir:

17. júlí: Ferðadagur
18. júlí: Fontur – Skálar 14 km
19. júlí: Skálar – Eiði 16 km
20. júlí: Eiði – Gunnólfsvík 25 km
21. júlí: Gunnólfsvík – Krokavatn – Hafralónsá 20 km
22. júlí: Hafralónsá – upp með ánni 25 km
23. júlí: Hafralónsá – Heljardalur – Haugsgil 25 km
24. júlí: Haugsgil – Hólskerling – Grímsstaðir 20 km

Alls 140 – 150 km
FERÐADAGUR heim á eigin vegum.

Verð 62.000 kr.

Nr.

2007L14
  • Norðausturland