Dags:
mán. 19. ágú. 2024 - mið. 21. ágú. 2024
Brottför:
kl. 09:00 frá Mjódd
Hér gefst kjörið tækifæri til að skoða sig um á fáförnum slóðum.
Nýjasti skáli Útivistar er Dalakofi í Reykjadölum, í jaðri Torfajökulssvæðisins að Fjallabaki. Þaðan er hægt að fara í lengri og styttri gönguferðir um fjölbreytt jarðhitasvæði. Þarna er meðal annars að finna Rauðufossafjöll, Laufafell og hverasvæðið við Hrafntinnusker. Einnig er hægt er að fara stutta göngu á Keili, útsýnishól skammt frá skálanum, eða í fjallabað í laug sem stundum er aðgengileg á aurum Markarfljóts.
Lagt af stað frá Mjódd á mánudegi og ekið í Dalakofann. Eftir að hafa komið sér fyrir í skála er farið í ca tveggja tíma göngu í nágrenninu.
Daginn eftir verður boðið uppá göngur við allra hæfi. Hvert ferðinni verður heitið kemur í ljós síðar. Farið verður í um það bil fjögurra til sex tíma göngu. Einnig verður farin léttari ganga í nágrenni Dalakofans fyrir þá sem það vilja. Þeir sem ekki hafa áhuga á gönguferð geta haldið kyrru fyrir í Dalakofanum og notið kyrrðarinnar.
Heimfarardag verður stoppað á leiðinni frá Dalakofanum og tekin um tveggja tíma gönguferð.
Innifalið: Leiðsögn, akstur, tvær skálagistingar, auk sameiginlegra kvöldmáltíða bæði kvöldin.
Fararstjórar eru Guðrún Frímannsdóttir, Jóhanna Benediktsdóttir og Guðbjartur Guðbjartsson