Saga Útivistar

Félagið Útivist var stofnað sunnudaginn 23. mars 1975 á fundi í Lindarbæ í Reykjavík þar sem mættir voru 54 stofnfélagar. Á fundinum voru samþykkt lög félagsins og kosnir 25 félagar í Kjarna og 6 til vara. Að loknum þeim fundi hélt Kjarninn sinn fyrsta fund og kaus 3ja manna stjórn félagsins sem skipuð var Einari Þ. Guðjohnsen, Jóni I. Bjarnasyni og Þór Jóhannssyni. Síðan fundaði stjórnin í fyrsta skipti og skipti með sér verkum þannig að Þór var formaður, Jón ritari en Einar meðstjórnandi og jafnframt framkvæmdastjóri félagsins.

Sótt var um starfsleyfi til ráðuneytis og viðurkenningu á félaginu sem ferðafélagi. Var sú umsókn staðfest og barst stjórn Útivistar hinn 13. maí 1975. Fyrsta húsnæði félagsins var að Lækjargötu 6a í Reykjavík.

Fyrsta ganga Útivistar var á Keili hinn 6. apríl 1975. Fararstjóri í þeirri ferð var Gísli Sigurðsson sem var reyndur fararstjóri, fróður og manna kunnugastur á þessum slóðum. Allar götur síðan hefur verið farin afmælisganga á Keili.

Árið 1981 var lögum breytt í því skyni að fjölga í stjórn félagsins. Stjórnarmenn urðu þá fimm talsins og þrír til vara. Sú skipan stjórnar hefur verið óbreytt síðan. Varamenn sitja stjórnarfundi og hafa þar málfrelsi og tillögurétt, en ekki atkvæðisrétt nema þeir leysi af fjarverandi stjórnarmann.

Í 2. gr. laga félagsins, sem samþykkt voru á stofnfundi, segir að tilgangur félagsins sé að stuðla að útivist fólks í hollu og óspilltu umhverfi. Í 3. gr. laganna er kveðið á um hvernig félagið hyggist ná þeim tilgangi sínum. Þar á meðal er að “koma upp gistiskálum, sem auðvelda ferðir og útivist á Íslandi”. Strax á stofnfundi beindust sjónir manna að Þórsmörk, en skiptar skoðanir voru um staðarval í Mörkinni. Niðurstaðan varð sú að Skógrækt ríkisins var skrifað bréf í maímánuði 1975 og óskað eftir aðstöðu fyrir félagið í Goðalandi. Endanlegar lyktir þeirrar málaleitunar voru að félagið fékk úthlutað svæði í Básum á Goðalandi.

Sumarið 1980 hófust byggingarframkvæmdir við skála í Básum og unnu Útivistarfélagar að byggingunni í sjálfboðavinnu. Í ágúst 1983 var síðan skálinn vígður. Auk skálans hafði þá verið byggt salernishús og leitt vatn á svæðið. Síðan var annar og minni skáli byggður á svæðinu og var hann tilbúinn til notkunar á 10 ára afmæli félagsins.

Allt frá því Útivist kom upp aðstöðu í Básum hefur hjarta félagsins slegið þar. Síðar kom félagið sér upp fleiri skálum eða gekk til samstarfs við heimamenn um nýtingu skála sem þegar voru til staðar. Skálarnir eru nú orðnir sjö talsins; í Básum, á Fimmvörðuhálsi, við Sveinstind, í Skælingum, við Álftavötn, Strútsskáli og Dalakofinn.

Frá upphafi hefur Útivist boðið upp á fjölda ferða á hverju ári og eykst úrvalið og fjölbreytnin ár frá ári. Þó eru alltaf nokkrir fastir punktar í starfsemi félagsins, til dæmis afmælisferðin á Keili sem áður var nefnd, Jónsmessunæturganga yfir Fimmvörðuháls og kirkjuferð í upphafi árs. Fjöldi fólks leggur hönd á plóg í sjálfboðavinnu, bæði við nefnda- og stjórnarstörf, vinnuferðir í skála og hvaðeina sem gera þarf. Fjöldi fararstjóra leiðir ferðir félagsins og tveir starfsmenn starfa á skrifstofu félagsins.

Ítarlegri frásögn af starfsemi félagsins fyrstu tíu starfsárin má lesa í grein Sigurgeirs Þorgilssonar Útivist 10 ára



  • Dags-
    ferðir

    Dagsferðir

    Almennar dagsferðir hafa allt frá stofnun félagsins verið einn af hornsteinunum í starfsemi Útivistar. Dagsferðir geta fallið niður ef þátttaka er ekki nægjanleg, en núna bjóðum við þátttakendum að skrá sig fyrirfram fyrir kl. 15 á föstudögum og fá þá góðan afslátt af þátttökugjaldi. Engu að síður er hægt að mæta að morgni ferðadags á BSÍ, en þá er alltaf hætta á að ferðin hafi verið felld niður vegna ónógrar þátttöku. 

    Næstu ferðir

  • Helgar-
    ferðir

    Helgarferðir

    Helgarferðir eru eins og nafnið gefur til kynna ferðir sem taka heila helgi. Göngur yfir Fimmvörðuháls eru klassískar helgarferðir en einnig hafa margar aðrar ferðir hjá Útivist fest sig svo rækilega í sessi að þær eru fastur liður á ferðaáætluninni. 

    Næstu ferðir

    24. nóvember 2017 - 26. nóvember 2017

    Aðventuferð

    29. desember 2017 - 1. janúar 2018

    Áramótaferð

  • Lengri ferðir

    Lengri ferðir

    Lengri ferðir eru göngur þar sem gengið er í þrjá daga eða meira. Í þessari dagskrá má finna bæði þekktar gönguleiðir eins og Strútsstíg og Sveinstind-Skælinga, en einnig eru þarna nokkrar spennandi nýjungar. 

    Næstu ferðir

  • Mynda-
    kvöld

    Myndakvöld

    Kaffi- og myndanefnd voru settar á stofn fljótlega eftir stofnun Útivistar. Markmið þeirra er að halda myndakvöld þar sem félagsmenn koma saman til að skoða myndir og hlýða á ferðasögur frá ferðum sem Útivist hefur staðið fyrir. Auk þess eru kynntar ferðir á nýjum slóðum. Oft eru fengnir utanaðkomandi aðilar til að kynna áhugaverð svæði.

    Glæsilegar kaffiveitingar eru eitt aðalsmerki myndakvöldanna. Félagslegi þátturinn er stór. Útivistarfélagar hittast, rifja upp góðar stundir og gæða sér á kræsingum af kökuhlaðborðinu.

    Myndakvöld eru haldin fimm sinnum yfir vetrarmánuðina og njóta mikilla vinsælda. Allur ágóði af myndakvöldunum er nýttur til að efla félagið. Lengst af var hann settur í uppbyggingu aðstöðu félagsins í Básum á Goðalandi. Nú síðustu ár hefur ágóðanum verið varið í kaup og uppsetningu útsýnisskífu á Réttarfelli og glæsileg fræðsluskilti í Básum.

    Öll herlegheitin kosta aðeins 1.500 kr. Gestir eru vinsamlegast beðnir að hafa handbært reiðufé því ekki er hægt að taka við greiðslukortum.

    Næstu ferðir

  • Hjóla-
    ferðir

    Hjólaferðir

    Hjólaræktin hefur starfað í allnokkur ár, en sífellt fleiri uppgötva hvað reiðhjólið er frábært til ferðalaga. Fastir liðir eru hjólatúrar á höfuðborgarsvæðinu á laugardögum yfir vetrartímann en þegar kemur fram á sumar er stefnan gjarnan tekin á lengri túra.  

    Næstu ferðir

  • Skíða-
    ferðir

    Skíðaferðir

    Skíðaferðir eru í boði fram að vori og leitum við þangað sem vænta má góðra snjóalaga. Þær er að finna í dagskrá dagsferða og helgarferða, en einnig bendum við á að alltaf er möguleiki á að skíðaferðir séu settar á dagskrá með skömmum fyrirvara og því er um að gera að fylgjast vel með hér á heimasíðu Útivistar.

    Næstu ferðir

  • Jeppa-
    ferðir

    Jeppaferðir

    Í jeppaferðum koma þátttakendur á eigin jeppum. Ferðast er í hóp undir leiðsögn fararstjóra sem hefur góða reynslu af þessari tegund ferðamennsku. Bæði er um að ræða vetrarferðir þar sem gerðar eru tilteknar kröfur um búnað jeppanna, svo og sumar- og haustferðir sem henta lítið breyttum eða óbreyttum jeppum. 

  • Fjalla-
    refir

    Fjallarefir

    Fjallarefir fögnuðu fimm ára gönguafmæli á síðasta ári og enn á ný skal haldið á vit íslenskrar náttúru í góðum félagsskap. Á námskeiðum Fjallarefa er gönguþrek markvisst byggt upp og þátttakendur kynnast fjölbreyttum gönguleiðum.

    Námskeið Fjallarefa er ætlað þeim sem áður hafa tekið þátt í námskeiðum og/eða eru í ágætis gönguformi. Námskeiðið felur í sér þrekgöngutíma, dagsferðir og helgarferð. Samhliða göngunum verður fræðsla þar sem þátttakendur safna í sarpinn hagnýtum upplýsingum sem tengjast útivist, til dæmis varðandi klæðnað, næringu, útbúnað og leiðarval. 

    Þrekgöngutímar eru á þriðjudögum og dagsferðir á laugardögum. Þátttakendur koma á eigin bílum á upphafsstað göngu en geta sameinast í bíla eftir hentugleikum. Til að taka þátt í haustnámskeiði Fjallarefa þarf að gerast félagsmaður í Útivist.

    Hámarksfjöldi: 40 manns.
    Námskeiðsverð: 18.000 kr.

    Næstu ferðir

  • Útivistar-
    gírinn

    Útivistargírinn

    Ókeypis göngur í nágrenni höfuðborgarinnar

    Komdu þér í Útivistargírinn fyrir sumarið með samheldnum hópi Útivistarfólks og nýrri tólf vikna dagskrá. Útivistargírinn leysir af hólmi Útivistarræktina sem starfrækt hefur verið í um 20 ár.

    Dagskráin hefst 5. apríl og stendur til 21. júní. Hópurinn hittist vikulega á miðvikudögum klukkan 18:00 við Toppstöðina í Elliðaárdal og gengur spennandi gönguleiðir í nágrenni höfuðborgarsvæðisins. Göngurnar henta flestum sem geta hreyft sig með góðu móti og eru nýliðar í útivist . Einnig er vant fólk hvatt til þess að taka þátt. Í þessum kvöldgöngum verður lögð áhersla á vinalegt andrúmsloft og kynningu á grunnatriðum í útivist og gönguferðum. Fjölbreytt starfsemi Útivistar, þar sem allir geta fundið eitthvað við sitt hæfi, verður einnig kynnt þátttakendum.

    Flestar göngurnar taka 2 – 4 klukkustundir. Þátttakendur sameinast í bíla og deila eldsneytiskostnaði.

    Kynningarfundur verður haldinn kl. 20:00 þann 29. mars - smelltu hér til að skrá þig.

    Þátttaka í göngunum er félagsmönnum Útivistar að kostnaðarlausu en skrá þarf þátttöku. Áhugasömum er bent á upplýsingar um skráningu á heimasíðu Útivistar. Gönguleiðirnar eru fjölbreyttar og tekur röð þeirra mið af veðri og færð hverju sinni. Auglýst verður á vef Útivistar, á Facebook síðu félagsins og á póstlista hvert verður farið hverju sinni.

    Fimm fararstjórar, Hrönn Baldursdóttir, Kristey Briet Gísladóttir, Hrefna Jensdóttir, Kristjana Kristjánsdóttir og Guðmundur Örn Sverrisson leiða þátttakendur Útivistargírsins. Óhætt er að segja að fararstjórahópurinn sé fjölbreyttur en samhentur og hlakkar til að taka vel á móti öllum þeim sem vilja komast í Útivistargírinn.

    Fylgstu með og skráðu þig á Facebook síðu Útivistargírsins.

     

    Næstu ferðir