Fimmvörðuháls - 1 dagur

Fimmvörðuháls

Hálsinn á milli Eyjafjallajökuls og Mýrdalsjökuls nefnist Fimmvörðuháls. Á síðari árum hefur leiðin um hálsinn, á milli Skóga og Þórsmerkur verið ein af vinsælustu gönguleiðum hér á landi. Leiðin sem farin er liggur frá Skógum og upp meðfram Skógaheiði og efst á hálsinum er skáli Útivistar, Fimmvörðuskáli. Frá Skógum upp að Fimmvörðuskála er um 6-7 klst ganga. Gengið er frá sjávarmáli og upp í 1100 m hæð.
Frá Fimmvörðuskála er víðsýnt í austur til Mýrdals og niður eftir hálsnium.
Frá skálanum er gengið um jökulfannir og ása, gegnum gosstöðvarnar og niður Bröttufönn.
Af norðanverðum hálsinum, í góðu skyggni er ógleymanlegt útsýni yfir Emstrur, Torfajökulssvæðið og yfir Landmannaafrétt. Frá Bröttufönn er haldið um Heljarkamb og farið eftir Kattahryggjum og niður í Strákagil og í Bása þar sem göngunni lýkur. Búast má við að gangan taki í heild sinni um 10-12 klst. Heildarvegalengd er um 26 km.

Hálsinn genginn á einum degi

Seinni hluta sumars þegar kvöldin og næturnar eru ekki eins bjartar eru Fimmvörðuhálsferðir Útivistar með því sniði að hálsinn er genginn á einum degi. Lagt er af stað á laugardagsmorgni með rútu frá BSÍ kl. 08:00 og keyrt að Skógum þar sem gangan hefst. Gengið er yfir hálsinn og niður í Bása þar sem hópurinn gistir í skála. Á sunnudegi gefst tækifæri til stuttra gönguferða um fallegt svæði í nágrenni skálans en rútan sem keyrir hópinn aftur á BSÍ leggur af stað kl. 13:00.

 

Farangur fluttur í Bása

Ferðalangar þurfa að huga vel að því hvaða farangur þeir hyggjast nota á Fimmvörðuháls leiðinni og hvað á að nota þegar inn í Bása er komið. Innifalið í ferðinni er sending á einum pakka í Bása á hvern þátttakanda og sjá fararstjórar um að þeir pakkar fari á réttan stað. Merkja þarf farangur vel. Nauðsynlegt er að nafn eiganda pakka komi fram sem og Útivist í Básum.

 

Drög að útbúnaðarlista

Full ástæða er til að benda fólki á að búa sig vel. Á Fimmvörðuhálsi er allra veðra von og því áríðandi að hafa góð hlífðarföt meðferðis. Góðir gönguskór eru mikilvægir sem og göngubuxur úr efni sem þornar fljótt og heldur hita þó að blotni. Gallabuxur eða slíkur fatnaður er ekki æskilegur í gönguferðum.

Hér fara drög að útbúnaðarlista sem miðast við göngu yfir Fimmvörðuháls:

  • Gönguskór
  • Göngusokkar
  • Auka sokkar
  • Legghlífar
  • Húfa
  • Vettlingar
  • Göngubuxur
  • Peysa (ull eða flís)
  • Nærföt úr ull eða ullarblöndu
  • Auka peysa
  • Vatns- og vindheldur hlífðarklæðnaður
  • Allir ættu að vera með nesti svo sem samlokur eða flatkökur, heitt og kalt vatn og ágætt er að hafa meðferðis orkuríkt nasl
 

Heimferð á sunnudag

Frá Básum er farið með rútu kl. 13:00 á sunnudag. Staðkunnir fararstjórar Útivistar sjá um leiðsögn á leiðinni. Tekið er stutt kaffistopp á Hvolsvelli. Áætluð heimkoma á Umferðarmiðstöðina er á milli kl. 18:00 og 19:00.

Frekari upplýsingar

Skrifstofa Útivistar veitir frekari upplýsingar um fyrirkomulag ferðarinnar og útbúnað. Afgreiðslutími skrifstofunnar er á milli 12:00 og 17:00



Skálinn á Fimmvörðuhálsi 
Skálarnir í Básum
Veðrið í Básum.