Skálinn við Sveinstind er suðaustan við fjallið. Aðkoma bifreiða er frá slóða að Langasjó en að skálanum er fylgt stikuðum slóða vatnamælingamanna til austurs. Fyrri hluta sumars geta verið sandbleytur í slóðanum. Gönguleið hefur verið stikuð frá akslóða að Langasjó að skálanum og einnig hefur verið stikuð gönguleið á tindinn frá suðvestri. Frá skálanum er þriggja tíma ganga á tindinn og til baka. Útsýni af Sveinstindi lætur engan ósnortinn, þar blasir Langisjór við í allri sinn tign, varinn af fjöllum og jökli. Einstök sýn er til austurs að Laka. Af áhugaverðum dagleiðum má nefna göngu inn með Fögrufjöllum. Skaftártungumenn gista í Sveinstindi er þeir smala Fögrufjöll. Húsið var endurreist af Útivistarmönnum haustið 1999 og var það einkar vel heppnuð framkvæmd, því húsið er bjart og hlýtt og sómir sér mjög vel í umhverfinu. Kynt er með litlum olíuofni og þar er jafnframt gashella og allra nauðsynlegustu eldunaráhöld. Á sumrin er drykkjarvatn leitt að húsinu. Svefnpláss er fyrir 20. GPS staðsetning er N 64°05.176´ W 18°24.946´



Marrit Meintema tók þessar skemmtilegu myndir þegar skálinn við Sveinstind var endurreistur haustið 1999 af Útivistarfélögum. Smelltu á myndina til að fá stærri útgáfu.