Víknaslóðir

Dags:

fös. 22. júl. 2022 - mán. 25. júl. 2022

Brottför:

Auglýst síðar

  • Skáli

Hinar svokölluðu Víknaslóðir eru margrómað gönguland sem enginn verður svikinn af að skoða. Þátttakendur koma sér á eigin vegum í Bakkagerði í Borgarfirði eystri þar sem gangan hefst og líkur.

 

1. dagur: Borgarfjörður eystri – Breiðuvík

Gengið er um Brúnavíkurskarð í Brúnavík og þaðan um Súluskarð og Kjólsvíkurvarp til Breiðuvíkur. Brúnavík er næsta vík sunnan Borgarfjarðar. Þar þóttu búsetuskilyrði góð áður fyrr en hún fór í eyði árið 1944. Í fjörunni eru fallegir líparítklettar sem vert er að skoða áður en haldið er áfram til Breiðuvíkur. Breiðuvík er landnámsjörð og fór í eyði árið 1947. Hún er vel gróin og umkringd fallegum líparítfjöllum. Gist í skála Ferðafélags Fljótsdalshéraðs í Breiðuvík.

Vegalengd 15 km. Göngutími 5-7 klst. Hækkun 850 m.

2. dagur: Breiðuvík – Húsavík

Gengið er til vesturs úr Breiðuvík í dalverpi sem liggur undir Hvítafjalli, Hvítuhnjúkum og Hvítserki. Þaðan er fallegt útsýni yfir Gæsavötn. Þegar beygt er til suðurs í átt til Húsavíkur er á vinstri hönd hinn sérkennilegi Hvítserkur, með sína dökku bergganga, sem margir hafa eflaust séð á myndum. Skáli Ferðafélags Fljótsdalshéraðs sem gist er í, stendur innst í víkinni. Út við sjó stendur Húsavíkurkirkja, byggð 1937, en kirkjustaðurinn Húsavík var metin dýrasta jörð á austurlandi á öldum áður.

Vegalengd 15 km. Göngutími 4-6 klst. Hækkun 580 m.

3. dagur: Húsavík – Loðmundarfjörður

Gengið er yfir Nesháls í átt til Loðmundarfjarðar. Þaðan er gott útsýni yfir fjörðinn og allt til Dalatanga ef skyggni er gott. Haldið er áfram göngu inn allan Loðmundarfjörð sem er fallega gróinn og má þar finna sjaldgæfar plöntur svo sem bláklukkulyng og gullkoll. Loðmundarfjörður er talinn hafa verið í byggð mest allan tíma Íslandsbyggðar en fór endanlega í eyði árið 1973. Gist er í skála Ferðafélags Fljótsdalshéraðs á Klyppsstað.

Vegalengd 13 km. Göngutími 5-5 klst. Hækkun 510 m.

4. dagur: Loðmundarfjörður – Borgarfjörður um Kækjuskörð

Gengið er 2km til baka frá Klyppsstað að Stakkahlíð og þaðan í norður eftir jeppavegi að Fitjum. Frá Fitjum liggur leiðin um Orustukamb, þar sem fundist hafa merkilegir steingervingar, síðan um Kækjuskörð og Kækjudal. Í Kækjudal stendur Kirkjusteinn, sem talinn er vera álfakirkja samkvæmt þjóðtrú. Göngunni líkur svo við Lambadalsá í Borgarfirði.

Vegalengd 15 km. Göngutími 5-7 klst. Hækkun 920 m.

Verð 71.500 kr.

Nr.

2207L09
  • Austfirðir