Búrfell í Grímsnesi sést víða að enda skyggja fá fjöll á það. Þar er ýmislegt að sjá t.d. leynist vatn við toppinn og steinbogi í hlíðum fjallsins. Farið frá kirkjustaðnum Búrfelli upp á efsta hluta fjallsins, haldið niður af því í átt að Írafossi og gengið með strönd Úlfljótsvatns. Vegalengd 15 km. Hækkun 400 m. Göngutími 5-6 klst.

Keilir á sérstakan sess í hjörtum Útivistarfélaga því þangað var haldið í fyrstu ferð félagsins. Upp á það hefur verið haldið árlega með ferð á fjallið og nú verður haldið upp á 35 ára afmælið. Keilir er eitt af mest áberandi og fallegustu fjöllum á Reykjanesskaga. Vegalengd 9-10 km. Hækkun 200 m. Göngutími 4 klst.

Fyrsti áfangi raðgöngu frá Maríuhöfn í Kjós að Skálholti. Þó svo að ætlunin sé að fylgja slóðum fyrri tíðar manna þá verður lögð lykkja á leiðina til að koma við á ýmsum áhugaverðum stöðum. Maríuhöfn var verslunarstaður fram á 15. öld og var m.a. sótt í kaupstað þangað frá Skálholti. Gengið þaðan yfir Hálsnes og inn eftir strönd Hvalfjarðar að Hvammsvík. Komið við hjá Steðja, farið yfir gömlu brúna á Fossá og eftir gamla veginum inn í Brynjudal að Ingunnarstöðum. Vegalengd 20 km. Hækkun óveruleg. Göngutími 7 klst.

Fyrrum höfðu bændur á Vatnsleysuströnd ær í seli uppi í hrauni. Gengið frá Grindavíkurvegi og farið á milli nokkurra selja í Þráinsskjaldarhrauni, s.s. að Brunnastaðaseli, Knarrarnesseli, Auðnaseli og Fornaseli. Vegalengd 15 km. Hækkun óveruleg. Göngutími 5-6 klst.

Gengið inn hinn gróðursæla og giljum prýdda Brynjudal og þaðan upp á Djúpadalsborgir. Þar er stuðlaberg sem vert er að skoða. Förinni beint að Sandvatni en þá er komið inn á hina hefðbundnu leið yfir Leggjabrjót. Síðan liggur leiðin niður að Hrútagili og áfram að Skógarhólum. Vegalengd 17 km. Hækkun 450 m. Göngutími 7 klst.

Löngufjörur eru mjög vinsælt útivistarsvæði, einkum meðal hestamanna. Vestasti hluti þeirra er Stakkhamarsnes, gríðarmikil hvít sandfjara, og verður að sæta flóði og fjöru til þess að komast út á það. Farið frá bænum Gaul út á nesið og m.a. skoðuð bein úr skíðishval. Þarna er mikil náttúrufegurð. Vegalengd 10-12 km. Hækkun engin. Göngutími 4-5 klst.

Gengið með rótum Ármannsfells um Bolabás að rústum Litla-Hrauntúns. Farið yfir hraun og gjár og sveigt að Hrafnabjörgum suðvestan við fjallið og áfram upp að Eldborgum. Þaðan yfir Reyðarbarmahraun að Barmaskarði. Við gönguleiðina eru margvísleg áhugaverð náttúrufyrirbæri. Vegalengd 15 km. Hækkun 300 m. Göngutími 6 klst.

Þegar ekið er á flatlendinu vestur Mýrar draga fjöllin inn til landsins að sér athyglina þó svo að þau séu ekki öll ýkja há. Eitt þeirra er Grímsstaðamúli en af honum sést víða m.a. inn að Langavatni og Sandvatni svo og yfir þann urmul tjarna og vatna sem eru á Mýrum. Leiðin liggur frá Grímsstöðum, upp með Stekká á hæsta hluta fjallsins, Hrosshyrnu. Þaðan yfir á hæsta hluta á vesturenda fjallsins og niður um Mjóadal. Vegalengd 15 km. Hækkun 400 m. Göngutími 6 klst.

Gengið með Litla-Reyðarbarmi suður í Kringlumýri. Þaðan um Biskupsbrekkur í hlíðum Lyngdalsheiðar og stefnt að vegi á milli Þóroddsstaða og Neðra-Apavatns. Vegalengd 15 km. Hækkun óveruleg. Göngutími 5-6 klst.

Rauðsgil í Borgarfirði er þekkt fyrir marga fallega fossa, t.d. Laxfoss, Bæjarfoss, Einiberjafoss og Tröllafoss. Gengið eftir gilinu og þaðan yfir á Búrfell og eftir hnúkum t.d. Auðsstaðahnúki, Hádegishnúki og niður í Augastaði. Vegalengd 15 km. Hækkun 400-500 m. Göngutími 6-7 klst.

Í þessum lokaáfanga raðgöngunnar frá Maríuhöfn í Kjós yfir í Skálholt verður farið sunnan Apavatns. Gengið upp á Mosfell og þaðan stefnt að brúnni yfir Brúará. Áfram liggur leiðin upp á Skálholtsása að biskupssetrinu í Skálholti. Vegalengd 15 km. Hækkun 200 m. Göngutími 5-6 klst.

Ætla mætti að þessi ferð hefjist á Keflavíkurflugvelli en svo er ekki heldur verður lagt í hann frá Botni í Botnsdal. Gengið upp með Botnsá og um Grillirahrygg yfir að Eiríksfossi og Efstabæ í Skorradal. Næsti áfangi liggur svo til Englands, bæjar í Lundarreykjadal. Vegalengd 16 km. Hækkun 400 m. Göngutími 6-7 klst.

Móbergsstapinn Hrafnabjörg stendur við Þingvallavatn umflotinn hraunum sem runnið hafa á núverandi hlýskeiði. Suðaustan fjallsins liggur gígaröð sem nefnist Eldborgir, gengið verður með henni að fjallinu austanverðu þar sem leitað verður uppgöngu. Vegalengd 10-12 km. Hækkun 400 m. Göngutími 5-6 klst.

Nafnið á þessu annálaða útsýnisfjalli hefur vafist fyrir sumum en kvígindi er gamalt nafn á ungnautum. Gengið frá Biskupsbrekku við Kaldadalsleið á topp fellsins en þaðan blasa Botnssúlur tignarlegar við. Af fjallinu verður gengið að Skinnhúfuhöfða við Hvalvatn og með Hvalskarðsá að Botni í Botnsdal. Vegalengd 18 km. Hækkun 500 m. Göngutími 7 klst.

Hefð er komin á að fara næturgöngu um hina vinsælu gönguleið Leggjabrjót aðfaranótt þjóðhátíðardagsins enda fátt betra en að vera á ferðinni á björtum sumarnóttum. Frá Svartagili liggur leiðin um Leggjabrjót meðfram Sandvatni og um Hrísháls niður í Botnsdal. Þetta er nokkuð greiðfær leið þó nafnið gefi annað til kynna. Oft er farið út af hefðbundinni leið; til að skoða efri fossinn í Öxará, Myrkavatn sem Öxará á upptök sín í og Djúpadalsborgir fyrir vestan Sandvatn. Þessi ferð er góð upphitun fyrir næturgönguna yfir Fimmvörðuháls á Jónsmessu. Vegalengd 17 km. Hækkun 500 m. Göngutími 6-7 klst.

Bjarnarhafnarfjall er á norðanverðu Snæfellsnesi við samnefndan bæ þar sem rekið er hákarlasafn. Gengið úr Seljadal skammt frá brúnni yfir Hraunsfjörð og upp á fjallið. Síðan norður eftir því að Skipþúfu og niður að eyðibýlinu Guðnýjarstöðum. Af fjallinu er gott útsýni yfir þann fjölda eyja sem prýðir Breiðafjörð og einnig yfir Snæfellsnes. Í lok göngunnar verður komið við á safninu og það skoðað. Vegalengd 10-12 km. Hækkun 600 m. Göngutími 5-6 klst.

Lagt verður upp frá bækistöð vélsleðamanna á Jökulhálsi og að mestu fylgt sömu leið og þeir fara, þannig er öryggið best tryggt. Þegar upp er komið verður látið á það reyna hvort færi er á uppgöngu á hæsta tindinn, Miðþúfu, en þar ræður mestu um hversu gljúpur snjórinn er.

Frá Nautafossi við Dragafell verður gengið vestur Hestdalsöxl og þaðan á Hádegishyrnu. Brúnir Skarðsheiðar þræddar í vesturátt og farið niður Þverfjall og Súlá fylgt niður á veg. Vegalengd 18 km. Hækkun 800 m. Göngutími 8-9 klst.

Í fjallabálkinum suðvestan Grundarfjarðar ber einna hæst Böðvarskúlu í Helgrindum. Í góðu veðri er útsýni þaðan geysimikið, bæði eftir Snæfellsnesi endilöngu og til beggja flóanna, Breiðafjarðar í norðri og Faxaflóa í suðri. Gangan á Böðvarskúlu hefst við bæinn Kálfárvelli á nesinu sunnanverðu. Fyrsti áfanginn er brattur en í u.þ.b. 300 m hæð er komið í dalverpi eitt, Kálfárdal. Gengið eftir dalnum endilöngum til norðausturs en ofan hans beygt til norðvesturs og haldið rakleiðis á Böðvarskúlu. Vegalengd 14 km. Hækkun 950 m. Göngutími 7-8 klst.

Í Tindfjöllum rísa hæst tindarnir Ýmir og Ýma. Af þeim er í góðu veðri stórkostlegt útsýni yfir Þórsmörk og Fjallabak allt til Hrafntinnuskers og Háskerðings. Einnig blasir Suðurland við og Hekla virðist næstum innan seilingar. Ekið verður eins langt og fært er, alla vega að neðsta skála, og gengið þaðan um Saxaskarð og Búraskarð, yfir jökulskallann að sunnanverðum Ými og upp í skarðið sem skilur að tindana tvo. Að lokinni uppgöngu verður haldið til baka norðan þeirra. Vegalengd 14-18 km (fer eftir því hversu langt rútan kemst). Hækkun 700-900 m. Göngutími 7-8 klst.

Óvíða gefur að líta jafn tignarlega tindaröð og Jarlhettur við Langjökul. Þangað er förinni heitið á fjall sem ýmist ber nafnið Stóra-Jarlhetta eða Tröllhetta. Hún er ekki sú hæsta í röðinni en þrátt fyrir það mest áberandi. Vegalengd 12-13 km. Hækkun 600 m. Göngutími 6 klst.

Borgfirðingar hafa hlaðið vörður á nokkrum stöðum sem tengjast Egilssögu Skallagrímssonar. Í Rauðanesi stendur ein varðan en þar reisti Skalla-Grímur Kveldúlfsson smiðju sína. Vegalengd 10-12 km. Hækkun óveruleg. Göngutími 4 klst.

Örnefnið Fanntófell hefur vafist fyrir mönnum. Hvort sem það er nú tó í fönn eða eitthvað annað þá stendur fjallið virðulega Ban í dyngjunni Oki. Gengið frá Kaldadalsvegi við Hrúðurkarla og farið upp suðvestan til á fjallið. Ágætt útsýni er af því einkum í suður og vestur. Vegalengd 11-12 km. Hækkun 400 m. Göngutími 5 klst.

Skriðan er stapi sem lítið ber á í fjallaklasanum upp af Laugardal. Eigi að síður er mjög gott útsýni af fjallinu enda afar falleg og formfögur fjöll í næsta nágrenni. Vegalengd 12 km. Hækkun 400 m. Göngutími 5-6 klst.

Farið upp á Miðdalsfjall og inn á Rótarsand þar sem oft má sjá Brúará koma upp úr sandinum eða fyrstu drög koma út úr berginu í skörðunum. Gengið niður skörðin að vestan eins og hægt er en síðan upp með þeim og áin vaðin á móts við Strokk. Haldið niður á Litlhöfða og með ánni að Sporðatjörnum og áfram niður í Miðhúsaskóg. Æskilegt er að hafa með vaðskó. Vegalengd 14 km. Hækkun óveruleg. Göngutími 5-6 klst.

Óhætt er að segja að ekki sé auðvelt eða hættulaust að ganga á Baulu vegna þess hve stórgrýtt hún er. Því er nauðsynlegt að velja leiðina upp á fjallið vel. Lagt af stað rétt sunnan Bjarnadalsár, þaðan fylgt gamla þjóðveginum um hina einu sönnu Bröttubrekku svo lengi sem það hentar. Síðan haldið fram Mælifellsgil þangað til komið er á öxlina milli Mælifells og Baulu. Þar er ágætur stígur á fjallið. Farin verður sama leið til baka að þessum stað en þaðan haldið niður austanvert og gengið suður Sátudal að Dýrastöðum. Vegalengd 13 km. Hækkun 850 m. Göngutími 7 klst.

Tindstaðafjall er í Esjunni og rís tindur þess tignarlegur norðan Blikdals og sést einkar vel þegar ekið er í átt að Hvalfjarðargöngum. Gengið á fjallið að norðan upp með Kerlingagili. Þegar upp á hnúkinn er komið verður haldið í suðaustur og stefnt á hæsta hlBa Esjunnar, Hábungu. Þaðan yfir á Skálatind og niður hann í átt að Meðalfellsvatni. Vegalengd 17 km. Hækkun 900 m. Göngutími 8 klst.

Flestir hafa farið yfir Hellisheiðina akandi á nokkrum mínútum án þess að huga að því að þar séu gamlar minjar. Frá Kolviðarhóli verður farið upp Hellisskarð og gamla þjóðleiðin gengin sem víða er vörðuð. Þar á meðal eru svokallaðar Þrívörður sem eru friðlýstar minjar. Einnig sjást för eftir hesta sums staðar í hrauninu og veghleðslur í Kömbunum. Mögulegt er að eitthvað af þessum minjum muni hverfa þegar vegurinn verður tvöfaldaður. Síðan gengið niður Kambana að Hveragerði. Vegalengd 12-14 km. Hækkun 100 m. Göngutími 5 klst.

Brekkufjall er glæsilegt, fallega lagað fjall norðaustan við Hafnarfjall. Gengið upp með Álfsteinsá á Sauðahrygg og síðan á hæsta hlBa fjallsins. Þaðan verður stefnt niður í Grjóteyrardal. Vegalengd 12 km. Hækkun 400 m. Göngutími 5 klst.

Við norðanverðan Hvalfjörð, ofan Miðsands, rís lítt áberandi fjall sem nefnist Brekkukambur. Af því er útsýni gríðarmikið og sér inn til jökla, upp til fjalla og út á nes. Haldið með Miðsandsá vestanverðri upp Sauðafjall á brún fjallsins. Gengið með fjallsbrúninni fram á Eystra-Kambshorn. Síðan liggur leiðin niður að rétt vestan við Bjarteyjarsand. Vegalengd 10-11 km. Hækkun 650 m. Göngutími 5 klst.