Langleiðin 2009
Raðganga Útivistar sem hófst 2. mars 2008, gengur undir nafninu Langleiðin. Segja má að þarna sé m.a. farið í fótspor Steingríms J. Sigfússonar alþingismanns og því er þessi leið gjarnan nefnd Steingrímsstígur. Í fyrstu voru áfangarnir farnir í dagsferðum en þegar lengra leið á sumarið og komið var upp á hálendið, urðu áfangarnir lengri eða nokkurra daga göngur.  Á þessu ári verður farið í tvær lengri ferðir, áfanga 11 og 12. Raðgöngunni lýkur á árinu 2010.

 

Í Nýjadal, var gangan nærri hálfnuð. Þráðurinn verður tekinn upp aftur í sumar 2009 og þá gengið alla leið út í Ásbyrgi og árið 2010 verður síðasti áfnginn farinn og lýkur göngunni úti á Fonti á Langanesi. Allir eru velkomnir með í gönguna, hvort heldur í einn áfanga eða báða. Þeir sem ljúka öllum áföngunum fá viðurkenningu fyrir þátttökuna í lok ferðar.
Ferðaárið 2009, Langleiðin:
Ellefti áfangi,  17. - 24.7. Nýidalur - Herðubreiðarlindir (L-11) (8 dagar) 0907LF13
Tólfti áfangi, 11. - 17.8. Herðubreiðarlindir - Ásbyrgi (L-12) (7 dagar) 0908LF06
 
Langleiðin (L-11) 17. - 24.7. Nýidalur - Herðubreiðarlindir

Frá Nýjadal liggur leiðin á slóðir útilegumanna í Vonarskarði. Vonarskarð er í skjóli jökla, Vatnajökuls og Tungnafellsjökuls, og þar er fjallasýnin fögur. Engar öruggar upplýsingar eru um að menn hafi komið í Vonarskarð fyrr en árið 1839. Þó er Vonarskarð nefnt í Landnámu er Gnúpa-Bárður flutti úr Bárðardal suður á land. Menn eru ekki á eitt sáttir um hvar það Vonarskarð er. Þar sem svæðið er langt frá byggð eru örnefni þar nýleg. Víðátta, einangrun, sandur, hraun, jöklar, dyngjur og fjöll einkenna göngusvæðið en það liggur um eða í jaðri fegurstu perla hálendisins. Gengin verður Gæsavatnaleið og komið í Gæsavötn, komið að gígnum á Urðarhálsi, í Öskju og í lok ferðar verður komið í gróðurvinina í Herðubreiðarlindum. Útsýnið er ekki af verri endanum; Bárðarbunga, Kistufell, Trölladyngja, Kollóttadyngja, Askja og Herðubreið. Ath. ef næg þátttaka verður í ferðina þá verður hún trússuð annars verður þetta bakpokaferð.


Langleiðin (L-12) 11. - 17.8. Herðubreiðarlindir - Ásbyrgi (L-12)
Gangan hefst í Herðubreiðarlindum þar sem sjarmi hálendisins blómstrar, þó svo að einmitt þarna hafi Fjalla-Eyvindur átt sinn erfiðasta vetur að eigin sögn. Gengið meðfram Lindaá og að upptökum Grafarlandsár og henni fylgt inn að Fremstafelli. Þá verður Jökulsá á Fjöllum fylgt að mestu norður fyrir þjóðveg að gamla ferjuhúsinu við Lindhöfða. Áfram verður haldið meðfram ánni að vestanverðu að Dettifossi þar sem verður tjaldað. Hér lækkar landið og áin steypist í stórum fossum niður í gljúfur sem við hana eru kennd. Gengið um Hafragilsundirlendi og að Hafragilsfossi og skoðaðir katlarnir þar sem Vígabergsfoss rann fyrrum. Farið um Hólmatungur og í Vesturdal þar sem slegið verður upp tjöldum. Úr Vesturdal verður gengið um Hljóðakletta og Rauðhóla og komið fram á brún Ásbyrgis ofan við Ástjörn. Austurbarmi Ásbyrgis fylgt að Gljúfrastofu. Ath. ef næg þátttaka verður í ferðina þá verður hún trússuð annars verður þetta bakpokaferð.





Ferðaárið 2008 var farið í neðangreinda áfanga:
Fyrsti áfangi, 3. mars, Reykjanestá — Grindavík
Annar áfangi, 16. mars, Grindavík — Latsfjall
Þriðji áfangi, 30. mars,  Latsfjall — Fjallið eina
Fjórði áfangi, 13. apríl, Fjallið eina — Djúpidalur
Fimmti áfangi, 4. maí, Djúpidalur — Vilborgarkelda
Sjötti áfangi, 25. maí, Vilborgarkelda — Meyjarsæti
Sjöundi áfangi, 29. júní,  Meyjarsæti — Hlöðufell
Áttundi áfangi, 20. júlí,  Hlöðufell — Hagavatn
Níundi áfangi, 2 . - 6. ágúst,  Hagavatn — Setur
Tíundi áfangi, 22. - 24. ágúst, Setur — Nýidalur
Langleiðin (L-1) Reykjanestá — Grindavík
Haldið frá Gunnuhver að litla vitanum á Skarfasetri á Reykjanestá sem er upphafsstaður „Langleiðarinnar“ sem endar á Fonti á Langanesi. Fylgt verður slóða sem liggur með ströndinni eftir Krossavíkur- og Háleyjabergi að brimkatlinum sem er sérkennilegt náttúrufyrirbæri. Þarna er gaman að fylgjast með samspili sjávar og lands einkum þegar það er brimasamt. Miklir skipskaðar hafa orðið á þessu svæði. Áfram verður haldið eftir Staðarbergi að Staðarhverfi en þar var prestssetur og kirkjustaður. Staðarkirkja var flutt í Járngerðarstaðahverfi árið 1909. Vegalengd 19 km. Hækkun óveruleg. Göngutími 6-7 klst.
Langleiðin (L-2) Grindavík — Latsfjall
Ströndinni fylgt út fyrir Þórkötlustaðanes, fram hjá Hrauni, í Hrólfsvík og að Dúknahelli. Þarna eru ýmsar minjar um forna útgerð. Hraunsvík er falleg vík þar sem mest ber á fjallinu sem að hálfu er horfið í hafið, Festarfjalli en það prýðir mikil bergfesti. Nú verður haldið frá ströndinni fram hjá Slögu, Skála-Mælifelli og í áttina að Latsfjalli. Vegalengd 19 km. Hækkun 100 m. Göngutími 6-7 klst. 
Langleiðin (L-3) Latsfjall — Fjallið eina
Frá Latsfjalli nálægt Ögmundarstíg verður gengið eftir Móhálsadal við austanverðan Núpshlíðarháls. Þegar Reykjavegurinn er farinn er gengið vestan megin við hálsinn. Haldið að fallegum dal prýddum háum hamravegg, Stóra-Hamradal. Síðan liggur leiðin að Vigdísarvöllum en þar var reist nýbýli árið 1830. Farið að Djúpavatni og um Hrútagjárdyngju að Fjallinu eina. Vegalengd 16-18 km. Hækkun óveruleg. Göngutími 7 klst. 
Langleiðin (L-4) Fjallið eina — Djúpidalur
Frá Fjallinu eina liggur leiðin með Undirhlíðum að Helgafelli. Það kemur á óvart að rekast á skógrækt á þessum stað en hún hefur verið stunduð frá 1934 í Skólalundi. Stefnt að Búrfellsgjá og haldið í gegnum Heiðmörkina að Geithálsi og Djúpadal. Fjölbreytt gönguleið. Vegalengd 20-22 km. Hækkun óveruleg. Göngutími 8 klst.  
Langleiðin (L-5) Djúpidalur — Vilborgarkelda
Frá Djúpadal liggur leiðin með brún Seljadals upp á Mosfellsheiði á milli Grímansfells og Borgarhóla. Á Háamel er heiðin hæst og þar opnast útsýni til austurs. Nokkru austar er sæluhúsatóft en þar var greiðasalan Heiðarblómið á árunum 1926 til 1930 eða þar til nýr vegur var lagður norður yfir heiðina. Frá rústum Heiðarblómsins liggur leiðin að Vilborgarkeldu. Víða má sjá hleðslur frá árdögum vegagerðar á Íslandi og listilega hlaðin ræsi.
Vegalengd 20 km. Hækkun 150 m. Göngutími 7 klst.
Langleiðin (L-6) Vilborgarkelda — Meyjarsæti
Frá Vilborgarkeldu verður gengið í átt að þjóðgarðinum á Þingvöllum. Farið með Hestagjá og um Almannagjá norður í Krika undir Ármannsfelli og þaðan um Hofmannaflöt að Meyjarsæti. Dagleið þar sem útsýnið er fallegt, jarðsagan sérstök og sagan merkileg. Vegalengd 20-22 km. Hækkun 200 m. Göngutími 7-8 klst.
Langleiðin (L-7) Meyjarsæti — Hlöðufell
Frá Meyjarsæti verður haldið í gegnum Goðaskarð og upp með Mjóafelli innra. Þaðan verður stefnt að Söðulhólum og fylgt jeppaslóða upp með hinum svipmikla Tindaskaga. Sunnan við Kerlingu undir Skjaldbreið verður komið inn á hinn forna Eyfirðingaveg sem þræddur verður með Skriðunni og alla leið að sæluhúsinu á Hlöðuvöllum undir Hlöðufelli. Vegalengd 26 km. Hækkun 200 m. Göngutími 9 klst. 
Langleiðin (L-8) Hlöðufell — Hagavatn 
Gengið frá Hlöðuvöllum yfir dyngjuna Lambahraun í Mosaskarð. Þaðan liggur leiðin með Fagradalsfjalli að nýju brúnni yfir Farið og upp að Hagavatni. Úr vatninu fellur foss sem heitir Nýifoss en oft hafa komið gríðarleg hlaup úr Hagavatni. Nú vilja menn fara að virkja á þessu svæði. Eyðimerkurganga í fagurri umgjörð fjalla. Vegalengd 20-22 km. Hækkun 300 m. Göngutími 8-9 klst.
Langleiðin (L-9) Hagavatn — Setur
Raðgangan frá Reykjanestá að Fonti á Langanesi heldur áfram frá Hagavatni þar sem endað var í dagsferð þann 20. júlí. Nú taka við lengri áfangar. Gengið inn Jarlhettudal og haldið með hinum svipmiklu Jarlhettum um sérlega skemmtilegt svæði inn að Skálpanesi. Þar verður sveigt til austurs og farið yfir Hvítá á brú. Haldið upp með Jökulfallinu að Innriskúta og stefnt í Kerlingarfjöll þar sem verður gist áður en lagt verður í lokaáfangann að Setrinu.
Langleiðin (L-10) Setur — Nýidalur
Áfram heldur raðgangan landshorna á milli og nú er komið að síðasta áfanga ársins og alls ekki þeim sísta. Úr Setrinu verður gengið um Blautukvíslareyrar að Nautöldu og áfram um Arnarfellsmúla að Arnarfelli hinu mikla. Þetta er mikið vatnasvæði og því verður að vaða nokkrar jökulár. Þjórsárver eru gróðursæl og  Arnarfell sem er upp við Hofsjökul er gróið upp í 1000 metra hæð. Á þessu svæði á gæsin athvarf og þarna sjást leifar af gæsaréttum. Síðan verður förinni beint yfir Þjórsárkvíslar og yfir Sprengisand norðan Hreysiskvíslar í Nýjadal.