Strútsstígur-Sveinstindur

Tvær stórkostlegar og fallegar gönguleiðir teknar saman. Gengið um Hvanngil, Mælifellssand, Hólmsárbotna, upp með Skaftá og á Sveinstind. Á leiðinni verður slakað á í Strútslaug, heitri náttúrulegri laug. Á góðum degi er víðsýnt af Sveinstindi yfir einstakt landslag mótað af eldvirkni, jöklum og beljandi jökulám.

Trúss   
Ferðirnar eru trússferðir. Farangur er fluttur á milli náttstaða, svo að þátttakendur þurfa aðeins að bera bakpoka með nesti og hlífðarfötum. Þótt ferðirnar séu trússferðir er gott að hafa í huga að trússbíllinn er ekki mjög stór. Því skal takmarka umfang þess farangurs sem tekinn er með. Ágætt er að taka ekki meira með en í hefðbundinni ferð þar sem gengið er með allan farangur. Ganga verður þannig frá öllum farangri að hann blotni ekki þó rigni á hann.

Dagur 1. 
Vegalengd um 18 km, göngutími um 6 klst. Farið frá Hvanngili yfir Kaldaklofskvísl, þaðan yfir Mælifellssand hjá Slysaöldu og austur yfir Veðurháls með Mýrdalsjökul á hægri hönd. Gist er í Strútsskála.

Strútsskáli 

Dagur 2. 
Vegalengd um 20 km, göngutími um 7 klst. Frá Strútsskála er gengið að Strútslaug og um Hólmsárbotna. Áfram liggur leiðin undir hlíðum Svartahnúksfjalla og með Syðri-Ófæru að endurbyggðum gangnamannaskála við Álftavötn.

Álftavötn

Dagur 3. 
Vegalengd um 25 km, göngutími um 9 klst. Frá Álftavötnum er haldið meðfram Syðri-Ófæru að Hólaskjóli og þaðan tekin stefnan á Eldgjá. Gengið að Ófærufossi og síðan upp á barm Eldgjár. Ef útsýni er gott er tilvalið að taka aukakrók upp á Gjátind. Þaðan er gengið niður í skála Útivistar á Skælingum.

Skælingar

Dagur 4. 
Vegalengd um 20 km, göngutími um 7 klst. Gengið frá Skælingum með fjallinu Gretti, um Uxatinda og Hvanngil að skála Útivistar við Sveinstind þar sem gist er síðustu nóttina.

Skálinn við Sveinstind

Dagur 5. 
Frá skálanum er gengið á fjallið Sveinstind og útsýnisins notið. Þaðan er gengið niður að veginum að Langasjó þar sem rútan tekur hópinn og flytur til byggða.