Ljósmyndaferð út á Reykjanes fyrir alla áhugasama, þar sem fólk miðlar sín á milli reynslu og kunnáttu í ljósmyndun. Farið er á einkabílum út að Garðskagavita á Reykjanesi þar sem reynt verður að fanga sólarlag ásamt hafi, himni og Snæfellsjökli sem sést í góðu skyggni í 100 km fjarlægð. Brottför frá bensínstöð N1 við Lækjargötu í Hafnarfirði kl. 11.  Mætið tímalega fyrir brottför og hafið þátttökugjald með í peningum (ekki hægt að greiða með korti).

Í þessari ferð er boðið upp á tvo áhugaverða fjallstinda í einni og sömu ferðinni. Annar tindurinn er í bókinni Fólk á fjöllum og því er þessi ferð upplögð fyrir þá sem hyggjast stefna á að safna tindum bókarinnar. Lagt er af stað frá Gunnuhver og gengið með Rauðhólum yfir að Sýrfelli. Að lokinni göngu á Sýrfell er stefnt til strandar og Brimketill skoðaður. Þaðan er gengið um Háleyjabungu að Skálafelli og út á Reykjanestá áður en gengið er til baka að Gunnuhver. Vegalengd 15 km. Hækkun 70 m. Göngutími 5 klst.

Ósar er grunnur fjörður sem gengur inn í Reykjanesskagann norðan við Hafnir. Þar eru vetrarheimkynni margra fugla og áhugavert svæði til fuglaskoðunar seinni hluta vetrar. Gengið verður frá Ósabotnum, norður fyrir fjörðinn og norður með ströndinni út að Hvalsnesi. Á leiðinni eru staðir sem eitt sinn voru þekktir á Íslandi s.s. Gamli Kirkjuvogur, Básendar og Stafnes. Á Hvalsnesi byrjaði Hallgrímur Pétursson sinn prestsskap. Vegalengd 14 km. Göngutími 5 klst.

Fyrsta ferð Útivistar eftir stofnun félagsins var á Keili. Á hverju ári síðan þá hefur verið farin afmælisferð á fjallið. Farið er frá Höskuldarvöllum yfir hraunið að fjallinu. Vegalengd 8 km. Hækkun 200 m. Göngutími 4 klst.

Sveifluhálsinn er röð af móbergstindum og hnúkum sem liggja meðfram Kleifarvatni að vestanverðu. Gengið verður frá Vatnsskarði eftir næstum endilöngum hálsinum. Hæsti hluti leiðarinnar er ekki í mikilli hæð, en hækkun er samt drjúg því hálsinn er mishæðóttur. Ágætis útsýni er af Sveifluhálsi en aðallega er hálsinn sjálfur áhugaverður, enda hafa veður og vindar myndað alls kyns form í móbergið. Vegalengd 14 km. Hækkun 600 m. Göngutími 6 klst.

Gömul alfaraleið. Lagt upp frá Skíðaskálanum í Hveradölum suður um Lágaskarð á milli Stóra-Meitils og Stóra-Sandfells, að Eldborgunum og um Sanddali. Göngunni lýkur við Þrengslaveg undir Litla-Meitli. 
Vegalengd 8 km. Hækkun óveruleg. Göngutími 4 klst.

Ferðin verður farin í samstarfi við Fuglavernd. Fuglaskoðun er félagslegur atburður og gaman að skoða fugla og atferli þeirra í tilhugalífinu. Farið verður á heppilegan stað, ekki of fjarri Reykjavík, en staðurinn verður valinn eftir aðstæðum þegar þar að kemur. Fólk er hvatt til að hafa með sér sjónauka og ljósmyndarar ættu að taka góðar aðdráttarlinsur með. Ferðin er skoðunarferð þannig að fólk þarf að hafa með sér góðan skjólfatnað. Skoðunartíminn er áætlaður 4-5 klst.

Gengið verður upp með Bjarnadalsá og meðfram Baulu. Gamla leiðin um hina raunverulegu Bröttubrekku liggur innst í dalnum og yfir í Suðurárdal. Áhugavert er að sjá þróun í vegagerð frá þessari fyrstu þjóðleið um Bröttubrekku yfir í þann veg sem nú er ekinn. Vegalengd um 10 km. Hækkun 200 m. Göngutími 4 klst.

Á leið að Gjánni er staldrað við hjá Hjálparfossi. Gjáin er sérstætt gljúfur í Þjórsárdal þar sem eru fallegar bergmyndanir, stuðlað hraun og móberg. Áin Rauðá rennur um Gjána og þar eru margar lindir og fossar. Eftir að Gjáin hefur verið skoðuð verður gengið yfir Stangarfjall að Háafossi og fossinum Granna. Þaðan liggur leiðin niður um Fossárdal að Stöng, yfirbyggðum rústum bæjar sem talinn er hafa farið í eyði árið 1104 eftir mikið öskugos í Heklu. Vegalengd 18 km. Hækkun 300 m. Göngutími 7 klst.

Hefð er komin á að fara næturgöngu um hina fornu og vinsælu gönguleið yfir Leggjabrjót. Það er fátt skemmtilegra en að vera á ferðinni í góðum hópi á björtu sumarkvöldi. Frá Svartagili liggur leiðin um Leggjabrjót, meðfram Sandvatni, um Hrísháls og niður í Botnsdal. Þetta er nokkuð greiðfær leið þó nafnið gefi annað til kynna. Í þessum ferðum eru tekin nokkur hliðarspor af hefðbundinni leið og má þar nefna skoðunarferð að efri fossinum í Öxará. Einnig verður gengið að Myrkavatni þar sem Öxará á upptök sín og að Djúpadalsborgum fyrir vestan Sandvatn. Þessi ferð er góð upphitun fyrir Jónsmessugönguna yfir Fimmvörðuháls. Vegalengd 17 km. Hækkun 500 m. Göngutími 6-7 klst.

Á undanförnum árum hefur Útivist haft þá venju að ganga á Snæfellsjökul á þessum tíma árs þótt hefðbundnum tíma jöklaferða sé löngu lokið. Lykillinn að þessu fyrirkomulagi er að fylgt er leið þeirri sem vélsleðamenn fara á jökulinn. Þannig er öryggið best tryggt. Það þarf vart að tíunda útsýnið af jöklinum. Í góðu veðri sést allt Snæfellsnesið, suðurströnd Vestfjarðakjálkans og Faxaflóinn. Ef snjórinn í Miðþúfu er nægilega gljúpur verður hún klifin, annars látið nægja að virða hana fyrir sér. Vegalengd 12-14 km. Hækkun 900 m. Göngutími 6-7 klst.

Eyjafjallajökull minnti svo rækilega á sig á ári 2010 að öll heimsbyggðin tók eftir. Við eldsumbrotin urðu talsverðar breytingar á landslagi í jöklinum sem forvitnilegt er að skoða og hér gefst færi á því með leiðsögn jarðfræðings. Gengið verður svokallaða Skerjaleið á jökulinn, upp hjá Grýtutindi sem er við Þórsmerkurleið. Þegar upp á Litluheiði kemur verður stefnan tekin á Skerin sem er fyrrum gossprunga sem nú stendur upp úr jöklinum. Gosstöðvarnar í Eyjafjallajökli verða skoðaðar. Vegalengd 18-20 km. Hækkun 1500 m. Göngutími 8-10 klst.

Gangan hefst við eyðibýlið Kötlutún vestan við Kalmanstungu. Gengið með rótum fjallsins að Draugagili sem er í fjallinu norðanverðu. Vert er að ganga inn í gilið og út frá því liggur annað gil þar sem gefur að líta stórar bergrósir. Eftir að gilin hafa verið skoðuð verður annað hvort gengið niður með Hvítá þar sem gefur að líta fossa og flúðir þar sem áin rennur í gegnum hraunið eða gengið upp á fjallið og þaðan niður á Efri- og Neðri-Öxl og að Kötlutúni. Vegalengd allt að 20 km. Göngutími um það bil 7 klst.

Göngur á Klakk eru ekki algengar. Fjallið er einn af útvörðum Langjökuls og rís upp úr jaðri jökulsins miðja vegu á milli Geitlandsjökuls og Hagafells. Gönguleiðin að honum er löng og úr fjarska ber hann ekki með sér að bjóða upp á mikið útsýni, en af tindi hans fæst sérstakt sjónarhorn yfir svæðið suður og suðvestur af Langjökli. Vegalengd 30 km. Hækkun 500 m. Göngutími 10-12 klst.

Í norðanverðum Skorradal er Stálpastaðaskógur, einn af þjóðskógum Íslendinga. Þar er trjásafn og fræðslustígar liggja um skóginn. Þema ferðarinnar verður nytjajurtir í skógum og verður hugað að því ætilega sem grær í skógum eða í skjóli þeirra, svo sem berjum, sveppum og jurtum. Auk þess verður að sjálfsögðu reynt að bera kennsl á þær tegundir trjáa og jurta sem vaxa í skóginum. Einnig er hægt að ganga upp fyrir skóginn til að skoða mismun á gróðri innan og utan skógar. Ef tími vinnst til verður komið við í íslenskum birkiskógi.

Ekið upp á Rótarsand frá Miðdal. Frá Rótarsandi er gengið á fjallið. Af fjallinu er gengið niður í Brúarárskörð, með Brúará og síðan Hrútá að sumarhúsabyggðinni í Miðhúsaskógi. Vegalengd 18 km. Hækkun 500 m. Göngutími 7-8 klst.

Göngufólk á leið í Brúarárskörð ekur í rútu með göngufólkinu sem stefnir á Högnhöfða, uns leiðir skilur á Rótarsandi. Brúará á upptök sín á sandinum og leið göngufólks liggur í Brúarárskörð. Í skörðunum vex áin en í hana streymir vatn víða úr berginu. Áin fellur í fossum niður á undirlendið og hefur hún grafið hrikalegt gljúfur á leið sinni. Gljúfrið verður skoðað og síðan haldið ásamt Högnhöfðahópnum niður með Brúará og Hrútá að sumarhúsabyggðinni í Miðhúsaskógi. Vegalengd 15-17 km. Hækkun óveruleg. Göngutími 7-8 klst.

Skriðutindar er tindaskagi austan við fjallið Skriðu. Þar sem þeir liggja alveg upp að Skriðu er þröngt dalverpi sem sagt er að sé hverju kvikindi ófært og þar þurfi að fara með varúð. Gangan hefst austan við Gullkistu sem er fyrir ofan Miðdal. Þaðan eru um 4 km að Skriðutindum. Tindarnir eru margbreytilegir að lögun og skemmtilegir að skoða. Þegar komið er austur fyrir tindaröðina er gott útsýni til Hlöðufells, Högnhöfða og Skriðu. Milli Skriðutinda og Skriðu er Litli Skriðukrókur og verður haldið þar inn að fyrrnefndu dalverpi. Þar er gengið upp eftir gili sem nær að þessu dalverpi og þaðan aftur niður á veg þar sem gangan hófst. Vegalengd um 22 km. Lítil hækkun. Göngutími 8 klst.

Margar herflugvélar fórust hér á landi í seinni heimsstyrjöldinni, en sjaldgæft er að hægt sé að skoða brak úr þremur flugvélum á nánast einum stað. Sú er þó raunin á Fagradalsfjalli og í nágrenni þess. Í þessum þremur slysum fórust 28 menn en 11 komust lífs af. Frá Slögu verður gengið austur fyrir Langahrygg, með viðkomu hjá Drykkjarsteini, þar sem fyrsta flugvélabrakið verður skoðað. Þar fórst Martin PBM-I Mariner, tveggja hreyfla bandarískur flugbátur árið 1941 og með honum ellefu manns. Var það mannskæðasta flugslys á landinu fram að þeim tíma. Vélin var á leið í Skerjafjörð þar sem hún hafði bækistöð. Síðan liggur leiðin að Langhól í Fagradalsfjalli. Þar fórst stór breskur Short Sunderland flugbátur, einnig árið 1941. Einn maður fórst í slysinu og tveir aðrir létust síðar af brunasárum á sjúkrahúsi. Tíu manns lifðu slysið af, mismikið slasaðir. Einn þeirra gekk 20 km vegalengd að Vogum á Vatnsleysuströnd til að ná í hjálp, eftir að hafa farið inn í brennandi flakið til að hjálpa mönnum út úr því. Næst verður gengið að Kastinu í vestanverðu fjallinu. Þar fórst bandarísk B-24 flugvél og með henni fórust fjórtán af fimmtán manna áhöfn. Þetta er mesta flugslys á landinu fram á þennan dag. Í þessu slysi fórst bandaríski hershöfðinginn Frank Andrews, sem var yfirmaður alls herafla Bandaríkjamanna í Evrópu. Talið hafði verið að hann yrði skipaður yfirmaður innrásarliðs bandamanna í Evrópu, en að honum gengnum varð það Dwight D. Eisenhower, hershöfðingi. Þetta slys hafði því viss áhrif á heimssöguna.Að lokum verður gengið fyrir Fremri-Sandhól, yfir Borgarhraun að Suðurstrandarvegi.Vegalengd 14-15 km. Hækkun 300 m. Göngutími 6 klst.

Skjaldbreiður er formfögur dyngja sem varð til í löngu hraungosi fyrir um 10.000 árum.  Gangan hefst við gíghólinn Hrauk og er að mestu gengið um sendið hraun og hraunrima að gíg fjallsins.  Þaðan liggur leiðin til norðausturs í átt að Tjaldafelli.  Vegalengd 13 km. Hækkun 550 m. Göngutími 6-7 klst.

Svínaskarð er á milli Móskarðshnúka og Skálafells og gatan um skarðið er gömul alfaraleið. Gengið er eftir slóða frá Flesjum upp í skarðið sem er í 481 m hæð og síðan niður að göngubrúnni yfir Skarðsá. Vegalengd 11-12 km. Hækkun 380 m. Göngutími 5-6 klst.

Grímsá í Lundarreykjadal er þekkt sem ein albesta laxveiðiá landsins. Efri hluti árinnar, sem er utan laxveiðisvæðisins, er áhugaverður til náttúruskoðunar en þar eru margir fallegir fossar. Lagt verður af stað hjá brúnni yfir Grímsá, skammt frá Brautartungu, og gengið upp með ánni að sunnanverðu. Á leiðinni eru fossar, svo sem Jötunbrúarfoss, Kleppafoss og Kerlingarfoss. Gengið verður að minnsta kosti upp að Selfossi en þaðan má ganga að Reykjatjörnum, yfir Reykjaháls og yfir að Reykjum eða Þverfelli. Vegalengd 15 km. Hækkun 200 m. Göngutími 6 klst.